Domingo, Outubro 17, 2021
Total visitors: 584029

Diretor Executivu Fundasaun Klibru Domin, Joaquim Soares informa durante periodu fulan Abril to’o Junho tinan 2021, sira deteta kazu foun me’ar tasak positivu hamutuk nain 80, ne’ebe maioria 80% prefere halo tratamentu iha uma tanba tauk ba hospital deteta sira positivu Covid-19.

Diretor Executivu Fundasaun Klibru Domin, Joaquim Soares informa durante periodu fulan Abril to’o Junho tinan 2021, sira deteta kazu foun me’ar tasak positivu hamutuk nain 80.

Nia salienta ema barak hakarak halo tratamentu iha klinika, maibe ho surtu Covid-19 ne’e tauk mai baixa iha klinika.

“Ita nia komunidade sira tauk tanba sira lakohi halo swab test Covid-19 nian. Foin lalais ita iha pasiente MDA TB ida konfirmadu Covid-19 tanba ne’e ami kolabora ho ekipa saúde halo swab test iha klinika ne’e identifika ema nain 9 konfirmadu positivu Covid-19, entau husi ne’e pasiente sira komesa tauk lakohi mai simu tratamentu iha ne’e sira prefere simu tratamentu iha uma deit,” nia hateten via telefone.

Nia hateten ekipa halo esforsu akompanha pasiente sira halo tratamentu iha uma tuir protokolu tratamentu moras TB nian durante fulan nen nia laran tenke hemu aimoruk lorloron.

Nia hatutan numeru pasiente TB ne’ebe baixa iha klinika Klibur Domin hamutuk nain 19 deit, pasiente sira ne’e nain 12 tratamentu phase premeiru no nain 7 seluk pasiente MDA entau tratamentu phase II.

Nia informa atividade outreach iha komunidade kontinua halao iha munisipiu Viqueque, Baucau, Liquisa no Dili.

Iha parte seluk, Diretora Jeral Prestasaun Saúde, iha Ministerio da Saúde, Dra. Odete da Silva Viegas hateten komunidade sira lakohi ba halo tratamentu iha sentru saúde no hospital tanba tauk deteta sira positivu Covid-19.

Nia dehan ema umanu iha sentimentu tauk ne’e normal, maibe labele husik tauk ne’e domina hodi lori fali konsekuensia ba vida.

“Ami nia observasaun hare katak ema barak tauk ba fasilidade saúde ne’e tauk atu deteta sira positivu, maibe nafatin enkoraja populasaun sira katak labele tauk tanba ita iha deit uma mos bele hetan infesaun. Entau moras tenke ba fasilidade atu hetan tratamentu ne’ebe diak liu duke iha uma tanba atu salva vida no hetan kura fatin mak sentru saúde no hospital sira,” nia hateten.

Nia hateten sira konsente ho situasaun ida ne’e no halo ona diskusaun ho parseru servisu sira hotu atu hare fali mekanismu aproximasaun ida ne’ebe efetivu hodi deposita konfiansa komunidade nian ba servisu atendimentu saúde nian inklui vasinasaun tanba taxa partisipasaun vasina tun signifikante.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04