Domingo, Outubro 17, 2021
Total visitors: 584029

Ministra da Saúde, Dra. Odete Maria Freitas Belo rekonhese kobertura vasinasaun Covid-19 iha teritorio nasional foin atinji seidauk bele lori Timor-Leste tama iha novo normalidade ou convive ho virus SARS-CoV-2 iha tempu badak.

Ministra da Saúde, Dra. Odete Maria Freitas Belo rekonhese kobertura vasinasaun Covid-19 iha teritorio nasional foin atinji seidauk bele lori Timor-Leste tama iha novo normalidade.

Nia dehan governu halo hela esforsu tomak atu hasa’e kobertura vasinasaun Covid-19 iha munisipiu sira ne’ebe aseitasaun ba vasina nian menus no konsiensializa ema hotu atu kumpri protokolu saúde publika tanba uniku dalan ida ne’e maka bele lori povu tama iha faze ida convive ho Covid-19.

“Ami iha enkontru hodiseik husu ona primeru ministru atu husik ministru sira hotu partisipa iha atividade kampanha ida ne’e tanba dala ruma ho prezensa membru governu sira nian bele motiva no fo konfiansa ba komunidade sira hakbesik aan mai simu vasina,” nia hateten iha Palacio Sinzas Kaikoli, Dili.

Nia hateten vasina efetivu atu prevene no minimiza risku mortalidade tanba realidade hatudu ema ne’ebe simu vasina dose rua kompletu sira hetan infesaun moras duni, maibe kondisaun la todan. No iha mos ema balun mate, maske sira simu vasina dose rua kompletu, maibe sira mate laos tanba Covid-19 mesak sira mate ho moras seluk ne’ebe sira sofre hanesan kurasaun, diabetes, infesaun pulmaun ne’ebe susar atu rekupara.

Tuir dadus kobertura nasional vasinasaun Covid-19 iha Timor-Leste, to’o iha loron 20 fulan Setembru tinan 2021, populasaun elejivel idade tinan 18 ba leten foin 32.5% mak kompleta simu vasina dose rua no 55.4% simu ona dose dahuluk.

Bazea ba rezumu analiza epidemiologia loron 13 ate 19 fulan Setembru tinan 2021, 94% mortalidade husi total komulativu kazu 104 mak seidauk simu vasina kompletu. No 5.8% mak simu vasina kompletu.

Iha parte seluk, programa Manager, iha Forum NGO Timor-Leste (FONGTIL), Lorenço Tito hateten monitorizasaun iha loron 13 ate 17 fulan Setembru tinan 2021, hatudu partisipasaun komunidade nian menus iha vasinasaun Covid-19 tanba dezinformadu.

Nia dehan komunidade iha area rural sei trauma simu vasina tanba inforasaun sira ne’ebe espalha relasiona ho reasaun adverse no menus konhesementu konaba importansia vasina ba saúde individu.

“Maske apoia lider komunitaria sira hodi promove partisipasaun komunidade atu simu vasina aas ona, maibe presiza nafatin komitmentu pesoal saúde, lider komunitaria sira atu aproxima mos ho Igreja hodi halo kolaborasaun ba promove partisipasaun komunidade bele aumenta hodi asegura prevensaun Covid-19 ne’ebe efetivu,” nia hateten.

Nia hateten munisipiu barak mak aseitasaun vasina minimu tebes, liu-liu iha area rural sira tanba ne’e governu tenke iha hanoin inovativu atu hasa’e partisipasaun.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04