- Publika iha: 08 Outubro 2021
Vice Presidente Parlamentu Nasional, Deputada Maria Angelina Sarmento hateten profesional saúde sira ne'ebe halao servisu iha postu saúde suku Kribas postu administrativu Manatutu la hela metin iha suku laran tanba ne’e populasaun ne’ebe hetan moras iha tempu kalan la hetan atendimentu urgente tenke hein to’o loron.
“Iha postu saúde, maibe pesoal saúde sira la hela metin iha ne’eba. Sira hela iha Manatutu villa mak lorloron ba halo tratamentu no fo konsulta ba populasaun sira, entau dala ruma populasaun sira hetan moras iha tempu kalan laiha ema fo atendimentu ba sira,” nia hateten iha plenaria parlamentu, Dili.
Nia dehan rajaun profesional saúde sira lahela metin iha suku laran tanba laiha fatin ba sira atu hela metin tenke ba mai.
Nia hateten minsiterio da saúde koloka profesional saúde sira iha suku tenke hare mos residensia ba sira atu hela hodi fo atendimentu 24 oras ba populasaun sira.
Iha parte seluk, Diretora Nasional Rekursu Humanu, iha Minsiterio da Saúde, Tomasia de Sousa rekonhese profesional saúde barak liu hela iha vila mak ba servisu iha suku tanba kestaun hela fatin, maibe sira muda ona estratejia atu solusiona problema ida ne’e.
“Rekrutamentu ne’ebe ami halo agora, ami prefere liu rain ain sira katak rekejitus ida mak orijinalidade laiha ida husi Manatutu ba fali servisu iha Liquiça. Rekejitus ne’e ami tau atu responde ba baut ida hela fatin ne’e,” nia hateten.
Nia dehan dadaun ne’e vaga ba postu saúde Liaruca, sira fo prioridade liu ba kandidatu sira husi Liaruca. Kuandu aplikante husi suku ne’e laiha bele mai husi postu adminsitrativu, maibe tenke prontu atu halao servisu.
Nia hatutan dalabarak sira hasoru problema tanba ema balun hahu servisu ho estado solteiru, depois servisu fulan nen forma ona familia hakarak hamutuk ho familia, maibe regras klaru atu muda husi fatin ida tenke kompleta lai servisu iha fatin inisiu durante tinan lima.