Sexta, Janeiro 21, 2022

Diretora Executiva Servisu Autonomu Medikamentu no Ekipamentu Saúde Institutu Publiku (SAMES, I.P), Santana Martins hateten sira rejista 148 ou pursentu 8% items husi total 1,779 items medikamentu no produtu mediku mak expiradu iha tinan 2021, tanba numeru visita pasiente ba fasilidade menus iha sentru saúde no hospital sira.

Diretora Executiva Servisu Autonomu Medikamentu no Ekipamentu Saúde Institutu Publiku (SAMES, I.P), Santana Martins hateten sira rejista 148 ou pursentu 8% items husi total 1,779 items medikamentu no produtu mediku mak expiradu iha tinan 2021.

“Husi dadus ne’e ekipa halo monitorizasaun no observasaun konaba utilizasaun medikamentu iha fasilidade saúde, liu-liu sentru saúde no hospital sira hatudu informasaun ne’ebe ami iha katak visita husi moras sira menus, entaun aimoruk balun nia utilizasaun ne’e sai kleur oituan no distribuisaun ne’ebe ami halo dalaruma kuantidade menus,” nia hateten bainhira halao aprezentasaun ezekusaun orsamentu tinan 2021, iha sala plenaria parlamentu nasional, Dili.

Nia dehan bazea ba lista medikamentu nian aimoruk ne’ebe rejista hamutuk 469 items, husi total ne’e 319 ou 68% items disponivel hela iha armajen sentral tanba ne’e servisu distribuisaun husi armajen sentral ba iha servisu saúde munisipiu sira inklui hospital lao hela tuir pedidu ne’ebe tama.

Alende ne’e nia dehan medikamentu 150 ou 32% items mak mamuk ou stok out hela, maibe sira konsegue estabelese ona kontratu ho kompanhia sira atu halo deliberasaun tanba situasaun atual ho propagasaun surtu Covid-19 sai mos obstaklu ba kompanhia sira atu hatama medikamentu ho lalais.

Enkuantu, Diretora Jeral Prestasaun Servisu Saúde, iha Ministerio da Saúde, Doutora Odete da Silva Viegas hateten bainhira akontese transmisaun komunitaria ho variante Delta numeru kazu aumenta makas rezulta numeru visita ba fasilidade saúde sira menus tanba ema tauk.

Nia dehan iha situasaun pandemia Covid-19 profesional saúde sira nafatin halao servisu atendimentu ba tratamentu Covid-19, vasinasaun no moras esensial sira hotu iha hospital sira durante 24 oras no oras ualu servisu iha sentru saúde sira hotu.

“Husu ba populasaun sira no komunidade sira kuandu moras nafatin hakbesik aan ba sentru saúde tanba dalabarak ho sira nia tauk ba Covid-19 atu teste swab sira ignora fasilidade saúde sira bele hetan moras todan iha uma bele lakon vida,” nia hateten.

Iha parte seluk, Membru Parlamentu, Deputado Luisa Taeki preokupa ho kondisaun armazena iha fasilidade saúde sira, ne’ebe la-adekuadu hanesan klot, laiha AC bele prejudika kualidade medikamentu no ekipamentu mediku sira.

“Ita hatene katak aimoruk balun sensitivu tebes ho manas, entaun ita bo’ot sira hanoin to’ok hodi bele tau atensaun,” nia hateten.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04