- Publika iha: 22 Novembro 2021
Xefe Unidade Banco de Sangue (BNS), iha Hospital Nasional Guido Valdares (HNGV), Januario da Cruz Freitas hateten iha fulan Outubru tinan 2021, banku de sangue liu husi atividade doasaun ran deteta ema nain 46 husi nain 456 mak sofre moras infesaun.
“Iha fulan Outubru nian ema sira ne’ebe mai teste ran hamutuk nain 456, no husi sira ne’e ema nain 410 mak fo ran tanba livre husi moras infesaun, entau ita fo ba ema moras sira ne’ebe presiza ran,” nia hateten iha servisu fatin Bidau, Dili.
“Ema individu nia moras ami labele koalia, maibe depois hetan moras sira ne’e ami halo karta ida sira ba konsulta iha VCCT kotuk ne’eba.”
Nia dehan husi 410 pakote ran ne’ebe sira rekolha kompostu husi tipu ran A iha 111 pakote, ran B iha 96 pakote, ran AB iha 22 pakote no ran O iha 181 pakote tanba ne’e sufisiente hela atu atende pasiente sira iha sala enfarmaria hospital nasional no hospital referral sira ne’ebe presiza ran urgente.
Nia hateten servisu transfusaun ran iha rai laran la estabel dala ruma stok ran iha no tempu balun mos stok ran laiha, entau familia sira tenke fo ran tanba numeru voluntario fo ran regular sei menus tebes.
Nia hatutan doasaun ran iha Timor-Leste pursentu bo’ot liu husi familia pasiente sira nian kompara ho grupo voluntario sira, maibe sira halo esforsu nafatin hamutuk ho organizasaun Cruz Vermelha Timor-Leste atu halo sosializasaun ba komunidade sira konaba vantajen doasaun ran regular no mobilize grupo voluntario sira halo doasaun ran.
Nia informa stok ran aktual iha loron 18 fulan Novembru tinan 2021, hamutuk 108 pakote ran ne’ebe disponivel, maibe iha posiblidade menus tanba nesesidade iha hospital sira bo’ot.
Iha parte seluk, Presidente Organizasaun Joventude Asaun ba Dezenvolvimentu Timor-Leste (JADTL), David Carvalho Amaral hateten sira sempre integra atividade doasaun ran iha kualker atividade ne’ebe sira realiza tanba joven tenke sai exeplu ba ema hotu liu husi asaun domin ne’ebe sira fo ba pasiente sira ne’ebe presiza ran iha hospital.
Nia dehan liu husi asaun solidaridade sira ne’e husi tempu ba tempu bele muda pensamentu sosiedade nian ba joven sira tanba durante ne’e ema hanoin joven mak halo ou autor ba krime sira iha rai laran.
“Ami halo doasaun ran tanba ami hare informasaun sira husi media katak iha Hospital Nasional Guido Valdares ema barak mak presiza ran, entau joven sira liu husi organizasaun ida ne’e ami kontribui ran turuk ida ba ita nia maluk sira ne’ebe presiza,” nia hateten.
Iha oportunidade ne’e nia enkoraja joventude sira atu voluntariu ba hospital nasional fornese ran regural tanba ema hotu halo asaun ida ne’e mak servisu atendimentu transfusaun ran sei lao diak no salva ema barak nia vida.