- Publika iha: 19 Janeiro 2022
Responsavel Sentru Hapara Fuma iha Dili, Doutor Eldino de Castro Rangel, informa fumador ativu nain 160 husi total 210 ne’ebe hetan akonselhamentu no tratamentu Nicotine Replacement Therapy (NRT) totalmente para fuma.
Nia dehan kliente barak mak para fuma ona, maibe nafatin sira halo akompanhamentu atu sira labele fuma fali tanba sigaru kontein 7,000 substansia kimiku inklui substansia nicotina ne’ebe estraga ema nia saúde, liu-liu kauza ba moras kankru, tensaun, stroke no moras lahada’et kronika seluk.
“Tuir matadalan ne’ebe iha pasiente ne’ebe mai ho nivel depedensia nicotine ki’ik, primeru sesaun halo akonselhamentu deit. Depois sesaun daruka sira seidauk para fuma ita identifika sira nia problema foin fo tratamentu NRT. Maibe ba sira ne’ebe mai ho depedensia nicotine a’as sesaun dahuluk ita hahu kedas ho akonselhamentu no tratamentu NRT kedas,” nia hateten iha servisu fatin Formosa, Dili.
Nia hateten hahu estabelesementu sentru hapara fuma iha fulan Outubro tinan 2021, kliente sira ne’ebe visita maioria ho idade reprodutiva no iha mos idade avansadu.
Nia hatutan sira barak mai ho problema saúde hanesan mear, iis bo’ot, kolen lalais tanba tinan barak sira konsumu sigaru.
Iha informa mos sira iha medikamentu NRT ne’ebe sufisiente atu fo tratamentu ba iha fumador sira ne’ebe hakarak para fuma tanba ne’e ba sidadaun sira ne’ebe fuma ativu hakarak para fuma bele visita sentru para fuma ou liga ba numeru hotline 1113 atu hetan akonselhamentu.
Iha parte seluk, fumador ativu Jezinho Felisberto Lopes idade tinan 24 hanesan estudante hateten hahu fuma sigaru ativu iha idade adolesente no difisil tebes para, maibe espera ho tratamentu NRT ne’e bele ajuda para fuma.
Nia konsente fuma ne’e ladiak ba saúde no fo implikasaun bo’ot ba ekonomia individu tanba loron ida hasai osan 0, 50 centavus hodi sosa sigaru faan rahun.
“Hau dadersan hader mai hirus matan moras ne’ebe hau sente parese kauza husi fuma tanba ne’e hau iha hanoin para duni fuma sigaru,” nia hateten.