- Publika iha: 21 Janeiro 2022
Diretora Servisu Saúde Munisipal Dili, Agustina Seguradu informa sidadaun nain 4,226 mak simu ona vasina Covid-19 dose III ou boosters, maibe kontinuasaun depende ba disponibilidade vasina Pfizer tanba vasina ne’ebe iha fo prioridade ba labarik sira idade tinan 12 ate 17.
Nia dehan iha loron 3 to’o 8 fulan Janeiru, sira deside fo vasina dose III ba pesoal liña frente sira hanesan profesional saúde, autoridade seguransa no membrus governu tanba eskola sira sei feriadu no numeru labarik sira mai iha fasilidade saúde menus tebes, maibe vasina lubun ida ne’ebe presiza uza hotu antes fulan ida.
“Lorloron ita loke ba labarik sira tanba vasina ne’e, mak ita uza ba labarik sira, maibe labarik sira la mai barak no aimoruk iha ita atende nafatin ba liña frente sira ne’ebe ho idade no komorbilidade, maske ida ne’e la rutina,” nia hateten iha sentru internamentu Vera Cruz Kaikoli, Dili.
Nia hateten tuir planu kampaña vasina dose III sei hahu fali iha fulan Febreiru, maibe depende ba disponibilidade vasina atu bele kobre ema hotu ne’ebe bele ona simu sira nia dose III.
Nia informa total labarik idade tinan 12 ate 17 ne’ebe simu ona dose primeru hamutuk 36,000, maibe sira ne’ebe kompleta ona dose segundu foin nain 29,000 tanba eskola sira seidauk hahu fali aula hafoin feriadu tinan foun.
Iha parte seluk, komunidade Manuel da Silva hateten vasina Pfizer mak bele fo ba labarik sira tanba ne’e tenke fo prioridade ba labarik sira atu sira mos bele iha imunidade forte hasoru surtu Covid-19.
“Hau hanoin vasina ne’e uniku vasina fo ba labarik sira no difisil tebes atu hetan, entau tenke fo prioridade ba labarik sira tanba ema adulto sira iha vasina seluk ne’ebe sira simu ona atu fo imunidade ba sira hasoru moras Covid-19,” nia hateten.