MS Hapara Utilizasaun Aimoruk Simvastatin No Dexamethasone

Diretur Nasional Farmasia no Medikamentu (DNFM), iha Ministeriu da Saúde, Delfim da C. X. Ferreira informa hafoin simu rezultadu teste medikamentu husi The Therapeutic Goods Administration (TGA), Australia, Ministra da Saúde Doutora Odete Maria Freitas Belo, fo kedas orientasaun suspende distribuisaun aimoruk Simvastatin no Dexamethasone husi armajen sentral ba fasilidade saúde sira no retira aimoruk refere husi fasilidade saúde sira tanba kualidade ladiak ou substandard.

Nia dehan governu iha akordu ho TGA, Australia, no sira oferese ba Timor kada tinan iha kouta bele manda aimoruk item lima hodi halo teste ba kualidade tanba ne’e iha tinan 2021, konsege manda aimoruk item lima kompostu husi Insulin, Simvastatin, Dexamethasone inklui item rua seluk, no rezultadu hatudu item Simvastatin no Dexamethasone kaulidade ladun diak atu utiliza ba tratamentu moras.

“Depois ami hetan relatoriu husi Australia, ami hasa’e kedas ba superior sira ministra no diretur jeral atu bele hetan orientasaun, no orientasaun tun mai katak ita suspende iha armajen SAMES no iha munisipiu sira, hospital sira ita dada fila fali para labele kontinua distribui. Ita hein fali item seluk ne’ebe sei subtitui ba item rua ne’e,” nia hateten iha Hotel Timor, Dili.

Nia hateten aimoruk rua referre governu mak sosa iha nasaun India, liu husi SAMES atu halo tratamentu ba moras kolesterol no moras infesaun sira.

Nia hatutan teorikamente iha fator barak ne’ebe kontribui ba kualidade produtu medikamentu iha mudansa, hanesan bele hahu husi produsaun rasik, liga ba ingridiente sira, bele prosesu transportasaun to’o mai armajen sentral, kondisaun armajen rasik liga ho temperatura, maibe sira seidauk identifika kauza prinsipal ba halo kualidade aimoruk item rua ne’e tun.

Nia haktuir aimoruk ne’ebe kualidade la prense padraun mak prosesu tratamentu sei la efetivu no bele kauza ba resistensia, kuandu aimoruk ne’e tama kategoria antibiotika.

Iha parte seluk, Xefe Sentru Saúde Comoro Interina, Constancio Barreto de J. Pereira hateten sira seidauk simu despacho no orientasaun husi nasional atu hapara utilizasaun aimoruk simvastatin no dexamethasone.

Nia dehan aimoruk dexamethasone stok laiha, maibe aimoruk simvastatin 20 gram stok iha no utiliza hela ba tratamentu pasiente sira ne’ebe sofre moras kolesterol aas.

“Ita seidauk iha investigasaun ida, maibe baibain ita uza duni aimoruk simvastatin ne’e ba pasiente sira ho kolesterol aas no ita seiduak iha investigasaun ida dehan pasiente sira hetan reasaun adverse ruma konaba aimoruk ne’e. Ne’ebe kuaze durante ne’e ita uza hela, agora investigasaun nune’e ona ita hein despacho tun mai ita hapara aimoruk ne’e,” nia hateten.

Nia informa iha aimoruk item balun ne’ebe laiha hanesan vitamina no buscopan hodi sona mak stok laiha, maibe iha item seluk ne’ebe bele subtitui tanba ne’e aimoruk sufisiente hela atu halo tratamentu ba moras sira.