- Publika iha: 02 Janeiro 2024
Xefe Sentru Saúde Ossoqueli, iha postu administrativu Vemasse, Munisípiu Baucau, Doutor Flaviano Verdial hateten, sira seidauk iha sala maternidade própriu hodi fó atendimentu partu ne’ebé moos, seguru no dignu ba inan isin-rua sira, ne’ebé partu. Tanba durante ne'e sira uza de’it kuartu ida ne’ebé besik sala-observasaun hodi fó partu ba inan sira.
Nia dehan sira iha ona rekursu umanu ne’ebé naton hanesan médiku Jeral nain neen, parteira nain rua no Enfermeiru inklui tékniku aliadu sira, ne’ebé ho statutu permanente hamutuk nain 11. Alende ne'e sira mos iha pesoal saúde internatu sira ne’ebé apoia servisu.
"Ita sei iha problema kona-ba fatin maternidade nian atu atende inan isin-rua sira fatin limitadu tebes. Durante ne'e ita uza hanutuk de’it iha sala-observasaun, entaun atendimentu inan isin-rua sira mai partu ne'e susar oituan," nia hateten bainhira partisipa iha lansamentu kampana integradu promosaun no edukasaun saúde, iha sede suku Loi-Lobu,Baucau.
Nia hateten kondisaun ida ne'e ladun diak tanba hamutuk deit inan isin rua sira sente la konfortavel atu partu no la garantia prevensaun infesaun.
"Ami hakarak maternidade ketak mak diak, atu nune'e ita bele atende inan isin-rua sira mai partu ne'e ho diak," nia haktuir.
Nia hatutan preokupasaun ne'e sira hato'o ona ba munisípiu no nasional, maibé seidauk iha resposta pozitivu atu harii fasilidade maternidade.
Nia informa kada loron durante 24 oras nia laran, parteira atende inan isin-rua partu hamutuk nain lima, ne'e númeru boot kompara ho kama rua no parteira nain rua.
Kona-ba aimoruk, nia rekoñese iha item aimoruk balun laiha inklui antibiotika sira inklui amocxelin.
Iha fatin selu, Xefi Suku Loi-Lubu Joanico da Costa Freitas informa infra-strutura fasilidade Saúde presiza tau atensaun atu pasiente sira bele sente konfortavel no servisu prevensaun moras infesaun mós lao.
"Ita-nia espasu limitadu entaun moras fasil hadaet ba ema seluk, tanba fasilidade no kama limitadu," nia hateten.
Nia hateten fasilidade no ekipamentu ne’ebé limitadu bainhira moras barak sira ne’ebé observa diak oituan ona haruka fila ba uma ba sira ne’ebé kondisaun grave transfere ba ospitál rejionál Baucau atu kontinua tratamentu.