Domingo, Julho 14, 2024

Xefe Gabinete Diresaun Jeral Hospitalar, iha Ministériu Saúde (MS), Paulina Pinto hateten Ministériu Saúde integra servisu Diresaun Nasionál Transporte Terrestres (DNTT) no Polísia Nasionál Tránzitu iha kampaña edukasaun no promosaun saúde ba komunidade ho objetivu atu hasa’e koñesimentu no konsiénsia komunidade nian kona-ba kódigu estrada inklui regra no regulamentu sira atu prevene asidente tráfiku, tanba numeru asidente tráfiku ne’ebé rejista iha fasilidade saúde sira aas.

Xefe Gabinete Diresaun Jeral Hospitalar, iha Ministériu Saúde (MS), Paulina Pinto hateten Ministériu Saúde integra servisu Diresaun Nasionál Transporte Terrestres (DNTT) no Polísia Nasionál Tránzitu iha kampaña edukasaun no promosaun saúde ba komunidade ho objetivu atu hasa’e koñesimentu no konsiénsia komunidade nian kona-ba kódigu estrada inklui regra no regulamentu sira atu prevene asidente tráfiku.

Nia dehan polítika no estratéjia ida-ne’e mosu bazeia ba dadus statístika fasilidade saúde sira ne’ebé hatudu la’ós de’it númeru morbilidade no mortalidade moras mak aas, maibé asidente tráfiku mos aas.

“Agora dadaun la’ós deit kazu morbilidade no mortalidade moras, maibé iha mos kazu asidente tráfiku ne’ebé aas liu. Entau politika ida agora ita halo planu integradu saúde involve liña ministériu sira hanesan DNTT no Tránzitu sira atu sira mos bele fahe informasaun kona-ba prosesu tratamentu dokumentu no regulamentu, regras tránzitu nian atu ema bele uza transporte ho seguru,” nia hateten bainhira partisipa atividade orientasaun kampañia integradu edukasaun no promosaun saúde ba autoridade lokal postu administrativu Laga, Munisípiu Baucau iha edifisiu administrasaun postu Laga.

Nia hateten iha atividade kampaña ne’e pesoal saúde sira koalia kona-ba prevensaun ba moras hada’et hanesan moras denge, tuberkulose no moras lahada’et hanesan moras diabetes, hipertensaun, saúde inan no oan no nutrisaun. Alende ne’e polísia tránzitu sei koalia kona-ba prevensaun asidente tráfiku liga ho komprimentu ba regulamentu sira.

Entretantu, Komadante Polísia Eskuadra Laga, Inspetór Asistente Duarte Belo Ximenes “Soru” hateten kontra bandu ne’ebé rejistu aas mak ema sira lori motor la uza kapaseti, hemu tua lanu lori motorizada no karreta ne’ebé rezulta sira hetan asidente.

“Ita-nia konsiénsia ne’e mak to’o ohin loron sei menus tanba dalaruma ami halo sosializasaun no passa revista sempre fó xamada atensaun ba komunidade jeral iha postu laran, maibé balun komprende barak la fó importánsia nafatin viajen ho motorizada la uza kapaseti,” nia hateten

Nia hatutan kada fulan sira rejista individu ne’ebé halo kontra bandu hamutuk másimu nain haat. Sira ne’ebé viola regra tenke asume responsabilidade, liu-liu aplika sansaun ba sira tuir lei haruka.

Iha parte seluk, Administradór Postu Administrativu Laga, Domingos Loiola Jose Pereira husu lideransa komunitária sira no grupo sira iha nivel suku atu partisipa ativu iha atividade kampaña integradu ne’e hodi sosializa informasaun ba komunidade sira hodi muda sira-nia mentalidade atu fó importansia ba sira-nia saúde.

“Ha’u-nia orientasaun ba autoridade lokal sira mak sira tenke komprende no kopera hamutuk ho ita nia saúde sira pakote ida hato’o informasaun ba komunidade sira kona-ba prevensaun moras ne’ebé afeta ba komunidade, tanba ita hotu hatene saúde iha ita-nia liman rasik,” nia hateten.