Domingo, Julho 14, 2024

Ministério da Saúde (MS) sosializa polítika estratéjia promosaun no edukasaun saúde ba Autoridade Munisípiu Viqueque, ho objetivu atu hasa’e koñesimentu sira-nian hodi kontinua habelar no eduka komunidade kona-ba prevensaun moras no adopta estilu moris ne’ebé saudável.

Ministério da Saúde (MS) sosializa polítika estratéjia promosaun no edukasaun saúde ba Autoridade Munisípiu Viqueque.

Reprezentante MS, Doutor João Francisco Sequeira hateten, kampaña Integrada ne'e atu empodera autoridade lokal sira-nia koñesimentu kona-ba moras sira ne’ebé afeta komunidade atu sira bele habelar ba komunidade, nune'e hamutuk redús taxa morbilidade no mortalidade iha komunidade.

“Materia importante ne’ebé ita hato’o mak kona-ba nutrisaun, saúde maternu infantil, moras hada’et hanesan moras denge, tuberkulose no seluk tan no moras lahadaet hipertensaun, diabetes. Alende ne'e asidente tráfiku nian,” nia hateten hafoin abertura enkontru advokasia kampaña integradu saúde iha Sentru Saúde Uatolari, Munisípiu Viqueque.

Nia hateten informasaun edukasaun no prevensaun ba moras sira-ne'e importante tebes atu muda komunidade nia mentalidade no prátika moris saudável.

Nia haktuir dadus nasional hatudu prevalénsia moras la hadaet ne’ebé rejista aas mak hipertensaun no moras hadaet mak tuberkoloze, tanba fator risku aas hanesan taxa fuma tabaku, hemu tua no dieta la saudável aas.

Nia informa atividade advokasia ne'e kobre postu administrativu Lima hanesan postu administrativu Viqueque Villa, Ossu, Lacluta, Uatolari no Uatocarbau.

Entretantu, administradór postu administrativu Lacluta, Pascoal Gama Martins hateten MS iha akordu kooperasaun servisu ho Ministério Administrasaun Estatal, tanba ne'e prontu atu simu orden servisu hodi implementa iha nivel komunidade, liu-liu reforsa atividade edukasaun no promosaun saúde hodi hasa’e ema nia koñesimentu no konsiénsia ba moris saúdavel.

“Ha’u sei buka meiu atu halo lina koordenasaun ho saúde, nune'e ita bele halo atendimentu ne’ebé di’ak atu komunidade labele sofre moras sira,” nia hateten.

Iha parte seluk, Xefe Sentru Saúde Ossu, Elsa Esperansa Monteiro da Costa Guterres hateten lideransa Konsellu suku sira nu’udar matan, tilun no ibun komunidade nian, entaun importante atu entende kona-ba polítika kampaña Integradu Saúde ne'e no iha koñesimentu kona-ba moras sira hodi habelar ba komunidade.

“Ita hakarak autoridade lokal sira hotu hatene ona lalaok servisu ne'e ba oin, tanba ita hotu hatene katak programa saúde no servisu saúde parte saúde labele la’o mesak, entaun presiza Ministériu relevante nia apoia no kontribuisaun hodi hadia prestasaun kuidade saúde primaria,” nia hateten.

Nia dehan depois enkontru advokasia, sira sei organiza eventu iha suku sira hodi habelar informasaun ba komunidade kona-ba prevensaun ba moras sira.

Tuir observasaun TDW iha terenu nota katak maske atividade advokasia ne'e la hetan partisipasaun másimu husi administradór postu sira, maibé hetan partisipasaun másimu husi lideransa komunitária sira iha postu administrativu lima refere.