Segunda, Junho 24, 2024
Total visitors: 766366

Vise Ministru Saúde ba Operasionalizasaun Ospitál, Doutor Flávio Brandão afirma kompromisiu governu nian atu introdus vasina Human Papillomavirus (HPV) ba prevensaun moras kankru servikal iha tinan ne’e 2024, tanba ne’e ekipa halo hela preparasaun teknika atu suporta kampañia vasinasaun iha teritorio tomak.

Vise Ministru Saúde ba Operasionalizasaun Ospitál, Doutor Flávio Brandão afirma kompromisiu governu nian atu introdus vasina Human Papillomavirus (HPV) ba prevensaun moras kankru servikal iha tinan ne’e 2024.

“Ekipa ne’ebé ita instala ona National Immunization Technical Advisory Grupos (NITAGs) atu hare konaba imunizasaun sira, iha tinan 2019, sira rekomenda atu introdus ona vasina HPV ka Human Papillomavirus atu prevene kankru serviks ba inan feto sira. Entau hodi realiza programa ida ne’e ita presiza rekursu ne’ebé tenke prepara no investe atu halo kobertura ne’ebé diak ba grupo trajeitu ne’ebé ekipa teknika identifika ona,” nia hateten hafoin halo enkontru kordenasaun ho Ekipa GAVI husi Geneva, iha salaun enkontru Palasio da Sinzas Caicoli, Dili.

Nia dehan iha tempu besik, sei organiza workshop nasionál ida atu hare hamutuk planu no atividade sira inklui fundu ba implementasaun programa nasionál vasinasaun nian.

Ministru garantia tinan ida ne’e 2024, Timor-Leste introdus ona vasina HPV ba feto foinsa’e sira no inan feto sira atu fo protesaun ba sira nia imunidade prevene infesaun virus HPV ne’ebé 99% kauza ba kankru serviks.

Entertantu, mediku onkolojista João Teodosio Amaral husu governu atu aselera introdusaun vasina HPV atu protese feto sira husi virus Human Papilloma Virus ne’ebé nudar kauza prinsipal ba moras kankru servikal.

“Notisia diak ida ba ita mak Ministeriu Saúde tinan ida ne’e, iha ona planu atu introdus vasina kontra virus HPV ne’ebe sai kauza prinsipal ba kankru servikal nian. Espera katak tinan ida ne’e, bele introdus ona mak sai pasu importante ba ita atu prevene no redus feto sira sofre kankru servikal,” nia hateten.

Nia haktuir fator risku sira ne’ebé kontribui ba moras kankru servikal mak halao relasaun seksual ne’ebé la seguru, relasaun seksual iha idade ki’ik, konsumu produtu planeamentu familia iha tempu naruk, infesaun iha oan fatin tempu naruk no stilu vida la saudavel. Maibe peskiza hatudu 95% kauza husi virus HPV.

Nia informa dadus statistika ne’ebé rejista iha ospitál nasionál iha tinan 2018 até 2020, pasiente kankru servikal hamutuk 64 no sira ne’e ida ne’ebé mak aprezenta aan iha profesionáis saúde sira.

Iha parte seluk, Reprejentante Organizasaun Mundial Saúde, Dr. Arvind Mathur, liu husi komunikadu ne’ebé TDW asesu, hateten kankru serviks kontinua sai hanesan todan bo’ot iha Timor-Leste, afeta feto barak nia moris, nune’e mos sira nia familia.

Nia dehan iha tinan 2019, feto nain 28 mak lakon sira nia vida tanba moras ne’e, ho numeru mortalidade atual ne’e no iha mos individual seluk ne’ebé afetadu, maibe la relata. Kada tinan iha stimasaun katak kazu kankru serviks 10 akontese ba feto 100,000 iha Timor-Leste, no feto nain 6 mate husi feto 100,000.

“Tendensia sira ne’ebe ita hare iha Timor-Leste hanesan ho tendensia sira ne’ebé observa ona iha mundu tomak, ho liu pursentu 85 husi ema sira ne’ebe afetadu mak joven feto, sira ne’ebe la hetan edukasaun natoon no moris iha komunidade ne’ebe iha rekursu minimu/kiak. Servisu rastreiu/screening no tratamentu ne’ebe limitadu no dezafiu sira atu asesu ba servisu hira ne’e hamosu atrazu iha diagnostika no tratamentu ne’ebé rezulta kankru avansadu,” nia hateten.

Nia hateten Timor-Leste iha ona dalan loos ba eleminasaun moras ne’e, tanba implementa ona intervensaun sira importante hanesan estabelese ona fasilidade rua rastreiu kankru serviks no jestaun iha hospital nasionál iha Dili no ospital Tirilolo iha Baucau.

Nia hatutan kauza moras kankru serviks mai husi Human Papilloma Virus (HPV), no Timor-Leste iha ona planu atu introdus vasina HPV iha tinan ne’e, ne’ebé alina ho OMS nia estratejia global ba kankru serviks. Entau Timor-Leste tenke servisu hodi atinji kobertura vasina HPV 90%, 70% ba kobertura rastreiu no 90% asesu ba tratamentu.

Nia haktuir halakon kankru serviks iha Timor-Leste nudar objetivu ida ne’ebé bele atinji, maibe presiza esforsu kolaborativu husi governu, profesionais saúde, komunidade no parseru internasional sira.