Segunda, Junho 24, 2024
Total visitors: 766366

Reprezentante Organizasaun Mundiál Saúde (OMS), iha Timor-Leste, Dr. Arvind Mathur hateten parseria servisu ho Ministeriu Saúde no Ministeiru Edukasaun, ba implementasaun programa Say No To 5S, identifika ona eskola tolu (3) iha munisípiu Dili, tolu iha munisípiu Baucau, tolu iha munisípiu Bobonaro no tolu iha munisípiu Manufahi atu estabelese klinika ka sala saúdavel hodi fornese tratamentu saúde imediata no edukasaun promosaun saúde ba komunidade eskola sira.

Reprezentante Organizasaun Mundiál Saúde (OMS), iha Timor-Leste, Dr. Arvind Mathur hateten parseria servisu ho Ministeriu Saúde no Ministeiru Edukasaun, ba implementasaun programa Say No To 5S.

Nia dehan sira kontinua ho kompromisiu atu apoiu Miniteiru sira halo extensaun atividade ne’e iha eskola sira hotu tanba eskola iha papel fundamental ida iha promosaun saúde ba bein-estar no iha dezenvolvimentu holístiku labarik no adolesente sira nian.

“Maske ne’e atividade pilotu, ha’u hakarak enkoraja Ministeiru Edukasaun atu konsidera programa ne’e nia sustentabilidade iha eskola hotu. Ho ida ne’e, dala ida tan hau hakarak garantia OMS nia kompromisiu no apoiu tomak ba asegura futuru labarik timoroan sira nian ne’ebé saúdavel no naroman liu,” nia hateten hafoin hafoi partisipa iha serimonia lansamentu klinika ka sala saúdavel iha eskola Ensino Baziku Central 10 Dezembru Comoro, Dili.

Nia hateten eskola EBC 10 Dezembru prense rekezitus tanba iha kondisaun infrastrutura ne’ebé adekuáda hanesan espasu ne’ebé disponivel no fasilidade adekuádu no komitmentu jestor sira nian atu implementa programa sira no halo jestaun ba klinika hodi fo tratamentu saúde ba estudante sira.

Alende, harii fasilidade, OMS kontratu enfermeira ida halao servisu no apoiu ekipamentu mediku no konsumível iha klinika ne’e hodi fo atendimentu saúde ba estudante no professor sira.

Nia haktuir projeitu Say No To 5S ne’e hetan apoiu fundus husi KOICA ho montante $3.5 milhaun. Programa ne’e foku ba rezolve hamlaha, lumringa hada’et husi rai, moras kulit no edukasaun konaba perigu fuma tabaku, konsumu alkohol no produtu midar sira ba saúde ne’e ho objetivu atu utiliza eskola sira hanesan plataforma estratejiku hodi mellora labarik sira nia saúde no nutrisaun.

Entretantu, Diretóra Jeral Kuidadu Saúde Primaria, iha Miniseriu Saúde, Elizabeth Leto Mau apresia ho inisiativa parseru dezenvolvimentu KOICA koperasaun ho OMS, ne’ebé harii ona sala saúdavel iha eskola sira.

“Ministériu Saúde prontu apoiu ba programa ida ne’e, liu –liu apoiu aimoruk esensial ne’ebé profesionais saúde sira presiza ba kuidadu saúde primaria nian no ekipamentu mediku ne’ebé utiliza atu fo atendimentu ba estudante no professor sira,” nia hateten.

Konaba sustentabilidade klinika nian, nia dehan responsabilidade Ministeriu Edukasaun no Ministeriu Saúde atu asegura funsionamentu tanba profesionais saúde destakadu laos deit fo tratamentu saúde, maibe mos fo edukasaun saúde ba profesores no estudante sira.

Iha parte seluk, Country Director KOICA, iha Timor-Leste, Younhwa Kang hateten sente onradu tebes servisu ho governu no povu Timor-Leste atu asegura dezenvolvimentu holístiku no bein-estar labarik sira nian.

“Sala Enfarmaria eskola iha benefisiu barak, hanesan pontu kontaktu dahuluk ba kualker asuntu saúde nian, asegura ita nia estudante sira simu tratamentu imidiata no halao sira nia papel importante iha promosaun edukasaun saúde no promove kultura saúdavel entre estudante sira,” nia hateten.

Nia espera komunidade eskola sira bele utiliza espasu ne’e ho diak no konsidera nudar komponente fundamental ida husi eskola komunidade nian atu asegura saúde ida ne’ebé naroman, saúdavel no seguru ba estudante sira.