Segunda, Junho 24, 2024
Total visitors: 766366

Diretór Klinika Bairo Pite, Inacio do Santos, hateten Klinika Bairu Pite (KBP), iha iha kapital Dili, enfrenta stock out ai-moruk item hamutuk tolunulu resin sia (39), tanba ne’e difikulta komunidade sira ne’ebé halo tratamentu iha klinika refere.

Diretór Klinika Bairo Pite, Inacio do Santos, hateten Klinika Bairu Pite (KBP), iha iha kapital Dili, enfrenta stock out ai-moruk item hamutuk tolunulu resin sia (39).

Nia dehan, stok out ai-moruk inkui item amoxilin, ibuprofen, sarope ba labarik sira, Hydrocortison, no seluk tan, entaun bainhira ema mai halo tratamentu pesoál saúde taka ho ai-moruk seluk, ou dala ruma pesoál saúde sira halo de'it reseita hodi ba sosa rasik iha klínika privadu sira.

“Ami durante ne’e servisu kontinua la'o nafatin hanesan baibain, la'ós tanba ai-moruk la iha ne’ebé ami mós la halo servisu ne’e lae. Ai-moruk sira ne’ebé la iha ami sempre lori ai-moruk seluk hodi taka, ou ami halo reseita bá halo tratamentu iha sentru saúde seluk, ou ba hola iha klínika privadu sira Díli. Ita labele husik de'it sira moras hanesan ne’e, ita tenke buka meiu seluk atu sira bele hatan ai-moruk hodi konsumu,” nia dehan iha KBP, Díli.

Nia hatutan, pasiente sira ne’ebé bá hola rasik ai-moruk ne’e hetan reseita husi pesoál saúde sira mak haruka ba hola, tanba ai-moruk iha klínika ne’e la iha, entaun sira tenke bá ba fali sentru saúde seluk, atu nune’e sira bele konsumu hodi bele rekupera lalais husi moras ne’ebé sira hetan.

Nia mós husu ba parte relevante liuliu Ministériu Saúde trata lalais problema aimoruk stock-out sira-ne’e, tanba sentru saúde ida mak la iha ai-moruk ne’e problema, tanba problema ne’e la'ós iha klínika Bairu Pite de'it, ida akontese ne’e iha munisípiu sira seluk mós.

Iha parte seluk, pasiente Jessi Maria Martins hateten, kada loron klínika Bairu Pite ne’e ema nakonu hela de'it, ba halo tratamentu, maibé haree ba moras barak liu labarik, ne’ebé mai ho moras oin-oin.

“Ha'u mós moras isin manas, ha'u mai halo de'it tratamentu iha ne’e dala ruma mós iha ne’e ai-moruk la iha, médiku sira haruka ami ba fali halo tratamentu iha sentru saúde seluk ou sira halo reseita ami ba hola rasik ai-moruk iha klínika privadu sira. Maibé la'ós ha'u ba hola arbiru de'it. Ha'u mai konsulta mak ai-moruk la iha entaun ha'u haruka sira hakerek de'it ai-moruk nia naran ha'u ba hola rasik de'it,” nia dehan.

Nia hatutan, ai-moruk hotu ne’e la signifika governu mak lahatama aimoruk, maibé kada loron pasiente ne’ebé konsulta iha klinika Bairu-Pite mak barak demais, entaun aimoruk hotu lalais de’it, tanba pessoal saúde sira iha klinika ne’e atende pasiente sira ho di’ak, maske pasiente mai barak sira atende di’ak to’o hotu.