- Publika iha: 16 Outubro 2024
Hospital Nacional Guido Valadares (HNGV) rejistu pasiente sira ne’ebé ba baixa iha sala-maternidade hahú fulan Janeiru to'o fulan Juñu tinan 2024 hamutuk rihun tolu atus lima sianulu resin haat (3.594).
"Ita rejistu pasiente ne'ebé mai baixa iha Sala-Maternidade hamutuk 3.594, kompara ho tinan kotuk, nia númeru la hanesan ho fulan neen nian, tanba inan barak maka hakarak mai partus hotu iha HNGV, entaun númeru inan ne'ebé baixa ne'e barak tebes," nia Informa.
Nia hatutan husi totál inan isin-rua sira ne’ebé baixa iha sala-maternidade ne’e balun partus normál no balun lae, bebé balun moris ho prematura menus, balun grama la to’o.
"Totál bebé ne'ebé moris hamutuk 3.508, no partus normál 2.391, partus sezariana 927, fakum ou ventoza 281 no sira ne'ebé moris ho prematura menus 2500, grama ne'e hamutuk 2.997 no bebé ne'ebé moris pezu normál liu 2500, grama ba leten ne'e hamutuk 3680 bebé," hatete Xefe Departamentu Obsaun iha HNGV Zinia Marscarenhas iha Sala-Materidade HNGV, Díli.
Iha fatin seluk, Jestór Programa Saúde Inan ho Oan iha Fundasaun Alola, Maria Imaculada Guterres esplika, parseiru sira nafatin apoia Ministériu Saúde hodi fó edukasaun ba komunidade sira liuliu inan sira atu oinsá bele ba halo tratamentu iha sentru saúde sira no postu saúde sira.
Nia deklara, servisu ne'ebé sira hala'o mak halo akonsellamentu no eduka inan isin-rua sira kona ba importánsia kuidadu antes natais, vizita regulár ba iha postu saúde sira ne'ebé besik no postu SISCA iha suku.
“Ami kontinua servisu no fó apoia ba Ministériu Saúde atu haree ba iha saúde inan ho ona no nutrisaun nian,” nia Informa.
Nia ko'alia, saúde materna iha mudansa, tanba inan barak mak iha ona konsiénsia partu iha fasilidade saúde no sira ne'ebé partu iha uma bolu ona parteira sira ne'ebé treinadór atu fó asisténsia ba sira, durante partus.
Nia esplika, sira mós iha programa ida kona-ba planu partu ne'ebé ho objetivu apoia fasilidade saúde lokál sira atu halo referal ba inan isin-rua sira ba sentru saúde hodi hetan partu ne'ebé mós no seguru.
Nune'e mós, Inan Isin-rua Anita Ximenes deklara, nia sei ba partus iha HNGV, tanba iha Sentru Saúde Lautem avizu ona katak, inan sira ne'ebé foin Premeira-vés partus tenke ba partus iha Baucau ou HNGV, tanba labele atende ba inan isin-rua sira ne'ebé foin partus.
"Ami iha Sentru Saúde Lautem, avizu ona katak, inan isin-rua ne'ebé foin partus normál labele partus iha ne'e, ba Ospital refere Baucau no HNGV, tanba sira ta'uk buat ruma, tanba foin primeira-vés partus, ne'ebé ha'u novembru ha'u tenke ba Díli hodi ba partus iha HNGV," nia afirma.