- Publika iha: 19 Outubro 2024
Hahú husi fulan Janeiru to'o fulan Jullu tinan 2024 Servisu Saúde Munisípiu Díli (SSM-Díli) Rejista kazu ba asidente tráfiku hamutuk rihun tolu atus hitu, hitunulu resin lima (3.775).
"Ita simu dadus kazu asidente tráfiku husi Sentru Saúde sira iha Díli, nune'e ita rejistu hamutuk 3.778 pasiente," hatete Diretór Servisu Saúde Munisípiu (SSM) Díli, Mateus Pinto iha nia knaar fatin Sentru Saúde Formoza, Díli.
Nia dehan, iha dadus ne'ebé husi Sentru Saúde Comoro (SSC) rejistu asidente tráfiku ne'e hamutuk 2183, Sentru Saúde Bekora (SSB) rejistu Kazu asidente tráfiku hamutuk 964, no Sentru Saúde Formoza (SSF) 52, Sentru Saúde Vera Cruz (SSVC) hamutuk 132, Sentu Saúde Metinaro (SSM) 444 nomós klinika privadu sira-na'in tolu (3).
"Ita sura husi Sentru Saúde sira-ne'e mak ita rejistu hamutuk 3.775, tanba asidente motorizada no karreta, depois hamutuk ho kanek kman no kanek todan nomós mate ida, ne'e mak númeru hamutuk ona ne'e," nia esplika.
Nia hatutan, asidente tráfiku akontese tanba, ema sira-ne’e barak kondús motorizada ho lanu no dukur, entaun labele kontrola aan ikus tenke monu, tanba ne’e mak kada loron ne’e asidente tráfiku ne’e sempre akontese.
Nia husu, ba kondutór karreta no sira-ne’e uza motorizada, tenke kuidadu aan, bainhira hemu tua di'ak liu deskansa tiha, sente di'ak uitoan mak bele la'o, labele obriga.
Iha fatin seluk, pasiente Rivaldo Amaral hateten, buat ida asidente ne’e la hatene atu akontese bainhira, tanba asidente ne’e derrepente de'it.
“Ha’u fila husi Likisa atu mai Díli, ha'u sente halai neineik de'it, ha'u to’o iha dalan sikun Tibar nian ne’e, ha'u-nia matan dukur derrepente de'it ha'u monu tiha ona ba rai, depois mak ha'u hatene katak ha'u monu,” nia haktuir.
Nia hatutan, ema sira tuir nia kotuk ne’e mós dehan halai neineik hela, nu'usá mak monu fali ne’e, entaun nia mós nonook de'it ona.
“Ita atu lori motór makaas to’o ne’ebé de'it, maibé asidente akontese ba ita ne’e, ita la hatene, hakfodak ita monu tiha ona mak ita hakfodak, tanba ne’e ita mak tenke kuidadu aan de'it, bainhira lori motorizada ka karreta, sente ita-nia matan dukur di'ak liu toba tiha de'it, labele obriga ita-nia aan,” nia akresenta.