Fasilidade Saúde Balun To’o Agora Sei Nafatin Enfrenta Ba Be’e Moos

Vise-Ministru Fortalesimentu Intituisional Saúde, José Magno hateten, fasilidade saúde balun iha área rurais to’o agora sei nafatin enfrenta ba bee moos.

Nia dehan, governu konstrui fasilidade lubuk ida iha área rurais atu nune’e bele fasilita komunidade sira, maibé fasilidade sira-ne’e balun sei nafatin enfrenta problema ba bee, tanba ne’e susar atu halo servisu ho di’ak.

“Ita konstrui fasilidade saúde lubuk ida, maibé bee mak la iha, tanba ne’e fasilidade sira balun to’o agora labele asesu ba bee moos,” Vise-Ministru Fortalesimentu Intituisional Saúde, José Magno hateten iha Hotel Timor, Díli.

Nia hatutan, fasilidade sira ne’ebé la asesu ba bee no saniomentu ne’e tanba governu konstrui fasilidade sira balun iha fali foho leten bee iha fali karaik, entaun susar atu asesu ba bee moos.

“Ita-nia fasilidade sira ne’ebé la asesu ba bee moos no saneamentu ne’e tanba fasilidade sira-ne’e iha fali fó leten, entaun bee iha kraik labele atu dada sae ba iha leten, entaun ida-ne’e mak sai problema ba ita atu asesu ba bee moos,” tenik Vise-Ministru Magno.

Iha fatin hanesan reprezentante WHO Dr. Arvind Mathur hateten, kanar WHO nian mak oinsa atu suporta analizasaun global ida ba bee moos no saneamentu iha Timor-Leste.

“Ami-nia knaar mak oinsa atu halo analiza global ba bee moos no saneamentu, tanba ita hotu hatene katak Timor-Leste iha bee ne’e diak iha área rurais no urbana, maské nune’e iha fatin balun seidauk asesu ba bee moos no saneamentu, tanba ne’e ita sei servisu hamutuk hodi bele rezolve lakuna sira-ne’e dadauk ita hasoru,” dehan reprezentante WHO Dr. Arvind.

Nia hatutan, atu rezolve lakuna sira-ne’e mak presiza parte hotu nia servisu makas hodi identifika loloos problema sira-ne’e.

“Ita hotu presiza servisu makaas no esforsu atu oinsa atu bele identifika lakuna sira-ne’e ita hasoru, tanba ne’e presiza ita hotu nia kontribuisaun hodi hatudu dadus ne’ebé loloos,” nia salienta.

Nia informa, informasaun sira ne’ebé hetan liuhusi levantamentu dadus sei fó mós evidénsia atu suporta foti desizaun ne’ebé informadu kona-ba bee no saneamentu iha nivel hotu.