- Publika iha: 29 Outubro 2024
Reprezentante Organizasaun Mundial Saúde (OMS) iha Timor-Leste Dr. Arvind Mathur hateten, Timor-Leste hanesan nasaun ida ne’ebé dahuluk uza plataforma dijitál E-GLASS online hodi halo analiza ba sistema Bee Saneamentu no Ijiene (BESI).
“Ha’u kongratula ba Timor-Leste, tanba uza plataforma dijitál e-glass online ba dalauluk, hodi halo analiza ba sistema BESI, ida-ne’e sei asegura katak dadus sira-ne'e asesivel liuhusi portal ba levantamentu no avaliasaun sira iha futuru,” dehan Reprezentante OMS Mathur iha Hotel Timor, Díli.
Nia hatutan, plataforma dijitál glass online ne’e bele ajuda foti desizaun ne'ebé informadu kona-ba bee, saneamentu no ijiene iha nivel hotu inklui desizaun polítika prinsipál nivel aas nian.
“Palataforma dijitál glass online ida-ne'e sei asegura katak dadus sira-ne'e asesivel liuhusi portal glas no ba levantamentu no avaliasaun sira iha futuru, informasaun sira ne'ebé hetan liuhusi levantamentu ne'e sei fó mós evidénsia atu suporta foti desizaun ne'ebé informadu kona-ba bee, saneamentu no ijiene iha nivel hotu inklui desizaun polítika prinsipál nivel aas nian,” nia esplika.
Iha fatin hanesan, Vise-Ministru ba Fortalesimentu Instituisional Saúde, José dos Reis Magno hatene, sistema glass ne’e di'ak tebes, tanba bele ajuda hodi halo analiza ba sistema BESI ne’ebé seguru ba komunidade sira.
“Glass ne’e di'ak, tanba bele ajuda ita hodi halo analiza ba sistema bee saneamentu no ijiene, atu nune’e bele asegura ita-nia komunidade sira, liuliu labarik, adultu no vulnerável sira. Sistema ida ne’e bele ajuda ita oinsá atu halo analiza ba bee seguru saneamentu no ijiene ne’ebé adekuadu ba komunidade, eskola, fasilidade públiku sira atu nune’e bele promove no asegura povu nia saúde iha Timor-Leste,” nia dehan.
Nia hatutan, Ministeriu saúde nia misaun importante mak oinsá atu komunidade sira bele asesu ba bee saneamentu ijiene atu nune’e labele hetan moras, tanba ne’e mak analiza no avaliasaun global ba BESI maka inisiativa prestasaun servisu fornesimentu programa ne’e iha rai-laran la'o ho di'ak.