Quarta, Fevereiro 19, 2025

Família Pasiente iha Hospital Nacional Guido Valadares (HNGV) kestiona servisu pesoal saúde sira, tanba halo atendimentu ba pasiente ladun di’ak.

Família Pasiente iha Hospital Nacional Guido Valadares (HNGV) kestiona servisu pesoal saúde sira, tanba halo atendimentu ba pasiente ladun di’ak.

Rivaldo Amaral hanesan Família Pasiente Maria Xavier hateten, pesoál saúde sira iha ne’e halo atendimentu la di'ak, tanba moras ida hanesan sira la sibuk, to'o moras hakas tiha kedas mak sira fó haree.

"Pesoal saúde sira halo atendimentu ba pasiente sira la di'ak, tanba pasiente sira moras hanesan babain ne’e ita ba bolu sira, sira la sibuk, agora moras makas tiha mak sira foin mai haree,"nia dehan iha HNGV, Díli.

Aleinde ne’e nia salienta, moras hotu-hotu ba konsulta iha HNGV sira simu mak paracetamol, ai-moruk seluk la iha.

Diretór Servisu Apoiu Diagnóstiku no Terapeutika HNGV Vidal de Jesus Lopes hateten, atendimentu iha HNGV la’ós pesoal saúde sira servisu la di’ak, maibé tanba ema moras barak liu, tanba ne'e pesoal saúde fahe tempu hodi halo atendimentu.

"Pesoal saúde sira iha ne'e la’ós servisu la di’ak, maibé pasiente mak barak liu, entaun ita tenke fahe tempu hodi halo atendimentu, la’ós pesoal saúde sira atu tau matan ba pasiente ida to’o hotu, ne’e lae.

Ita haree iha semana ida-ne'e nia laran, pasiente barak tebes, to’o kama iha HNGV mós hasai hotu tiha ona, agora ita haruka balun ba iha Lahane, tanba pasiente barak liu," nia esplika.

Nia salienta, pesoal saúde sira mós fó ai-moruk tuir moras, la’ós naran fó deit, se moras isin manas fó paracetamol, la’ós fó fali ai-moruk seluk.

"Ita fó ai-moruk bazeia ba moras, ita la naran fó ai-moruk ba pasiente sira, se isin manas ita fó ai-moruk isin manas nian," nia afirma.