Domingo, Julho 14, 2024

Atu prevene aan husi moras oi-oin, ema hotu presiza hamos ambiente inklui uma ninin sira nune’e susuk labele tolun no hada’et moras.

“Presiza fo formasaun diak ba komunidade sira kona-ba saude publiku,liu-liu oins amak sira bele hamos ambiente, hamos uma ninin, baleta kuak sira, tau foer iha nia fatin atu nune’e bele hado’ok aan husi moras hotu,”hateten  Xefe Sentru Saude Formoza (CSF), Jaime dos Santos Reis Belo, iha Bairo Formoza,Dili.

Nia parte hato’o kestaun ne’e relasiona ho numeru moras ne’ebe kontinua rejistu aas iha CSF, hanesan moras ispa, malaria,diarea, moras kulit inklui  mal nutrisaun.
Tuir nia, moras ispa tanba agora tama ba bailoro no halo rai rahun suar maka’as entaun bele afeta ba ema nia saude.

“Moras hirak ne’ebe temi iha leten ne’e la’os deit ba labarik maibe mos ba ema bo’ot sira tantu ferik-katuas,  joven  feto no mane,”nia dehan.

Entretantu  komunidade ne’ebe lakohi fo sai nia identidade ba publiku, husu ba ekipa hamos rai nian (Pasukan biru) husi Saneamentu Distritu Dili atu rega netik estrada nune’e rai rahun labele suar.

“Sira labele dasa deit foer iha estrada maibe tenke rega  netik nune’e  rai rahun labele suar hodi afeita ba komunidade sira nia saude,”nia husu.