Domingo, Julho 14, 2024

Moras ISPA (Infeksaun Sistema Respiratoriu) mak nafatin reprezenta numero aas pasientes sira iha Hospital Nasional Guido Valadares (HNGV), iha Sentrus Saude no mos klinikas privadu iha Kapital Dili laran, liu liu ba labarik sira ne’ebe afekta liu tanba ambiente foer no rai rahun barak tanba agora tempu bailoron.                             
“Tan ne’e hau husu ba inan-aman, atu tau matan ba labarik sira la bele halimar rai rahun no la bele hemu be matak tamba husi sira ne’e mak fo impaktu ba moras, no tenke eduka sira hemu be barak atu nune’e bele prevene moras ne’e” hateten Doutora Vitalina Araujo Vilanova ne’ebe fo atendimentu sauda ba pasientes Sentru Saude iha Bairo Formosa iha Dili, semana kotuk.
Nia haktuir katak dala ruma pasientes sira tama iha Sentru Saude ho kondisaun grave ona no tenki refere ba Hospital Nasional HNGV atu bele halao tratamentu intensive diak atu rekupera pasientes sira nia saude.
Entretantu tuir Doutór Daniel Murphy hosi Klinika Bairo-Pite iha Dili katak sira nia sentru mos bebeik halao tratamentu ba ema moras ho ISPA no mos moras seluk hotu. Dr. Dan akonselha ema hotu atu kura ISPA liu hosi tratamentu rasik bele halo iha uma.
“Ba ema ne’ebe mak hetan moras ne’e ami sempre, husi distritu ka iha Dili, no ba sira ne’ebe hakarak di’ak, di’akliu hemu bee barak no han ai-fuan barak ne’e bele ajuda” hateten Dr. Dan.
Iha parte seluk, komunidade Aleixo dos Santos ne’ebe halao moris nu’udar vendedór iha Dili laran prekupa liu ho fasilidade atu halo tratamentu ba moras ISPA liu liu iha distritus seluk iha rai laran.
“Tempu agora ne’e moras ne’e [ISPA] la’o, tan ne’e Hospital ka klinika hotu iha distritu-distritu tenke prepara ai-moruk atu nune’e ema ne’ebe maka hetan moras ne’e la presiza mai halo tratamentu iha Dili sela’e sira gasta sira nia osan para selu transporte tanba de’it hakarak mai halo trantamentu,” hateten komunidade dos Santos.