Segunda, Julho 15, 2024

Tanba laiha kontrola husi petugas kebersihan ospital nian, Ospital Referal Baucau (ORB) iis no situasaun ida ne’e bele afeta ba pasiente sira ne’ebe baixa iha ospital ne’e.
“Hau tama iha ospital Baucau nia laran dois para mate,”hateten Deputadu David Diaz Ximenes, semana kotuk (23/08) iha plenaria Parlamentu hafoin halo fiskalizasaun iha fatin refere iha semana kotuk.
Nia parte sente triste liu bainhira hare pasiente sira ne’ebe baixa iha ospital ne’e toba hanesan knuk laran.
“Hau hanoin governu presiza tan osan para atu hadia ospital ne’eba,”David sujere.
Entretantu Deputadu Domingos Mesquita hateten governu tenke halo kontratu ho kompania ruma atu hamoos ospital sira.
“Ospital tenke hijieneku,moos atu nune’e labele afeta ba pasiente sira ne’ebe baixa iha ospital,”nia dehan.
Hatan ba kestaun ne’e Ministru Saude Nelson Martins hateten, ministeriu labele halo intervene maibe apoiu deit orsamentu.
“Sira iha sira nia estatuta rasik, sira iha konsellu administrasaun, tuir lei ami labele halo intervene maibe kada fulan ministeriu tau US$ 20 mil ba ospital Baucau nian hodi hala’o atividade ospital nian,”nia hateten.
Tuir nia, Diretor Jeral ospital nian mak tenke kontrola nesesidade ospital nian.
Enkuantu orsamentu ba Ospital Nasional Guido Valadares rasik kada fulan US$ 30 mil no ba distritu sira seluk US$10 mil.