- Publika iha: 01 Outubro 2011
Moras ISPA (Infeksaun Sistema Respiratoriu) mak hetan numeru aas no afeita maka’as ba labarik sira iha Klinika Bairo-Pite (KBP)tanba impaktu husi bailoro ne’ebe halo rai rahun suar iha fatin-fatin.
“Tan ne’e hau husu ba inan-aman sira atu tau matan ba oan sira atu labele halimar rai rahun, labele hemu bee matak tanba husi sira ne’e mak fo impaktu ba moras,”hameno Dra.Faustina semana kotuk (14/09) iha Bairo-Pite,Dili.
Tuir nia, maske lahatene numeru ezatu labarik sira ne’ebe hetan moras ISPA no halo konsulta iha klinika ne’e, maibe doutora ne’e dehan labarik sira ne’ebe mai kondisaun grave, nia parte transfere ba iha Ospital Nasional nune’e bele hetan tratamentu intensive.
“Ne’ebe dala ida tan husu ba inan-aman sira atu kuidadu oan sira ho didiak, liu-liu bainhira sira hetan moras ne’e tenke lori lalais ba iha sentru saude ne’ebe besik,”nia husu.
Entretantu tuir Bemvinda da Silva, inan ida ne’ebe hein hela nia oan konsulta tanba moras ISPA katak moras ISPA sempre mosu bainhira tama ba bailoro, liu-liu ba labarik sira.
“Tanba labarik maske ita kuidadu maibe bainihra sira hare nia maluk sira halimar entaun sira mos hakarak halimar ho rai rahun, maibe hau sempre lori hau nia oan mai iha ne’e bainhira nia hetan moras, laos deit moras ISPA, moras saida deit hau tenke lori ba sentru saude,”nia katak.