Domingo, Julho 14, 2024

Labarik no inan isin rua ne’ebe moris iha liña pobreza nia kraik sensitivu liu atu hetan kondisaun mal nutrisaun tanba konsume hahan ne’ebe valor nutrisaun la iha mak barak liu. Mal nutrisaun afeita ba labarik no inan isin rua tanba sira ladun kontrola ba sira nia dieta hahan lor-loron no tanba impaktu seluk mak tanba kondisaun uma laran ladun favoravel.
Vise Ministra Saúde, Madalena Hanjam hatete tuir dadus tinan 2010 nian, porsentu 32 husi adultus feto no labarik porsentu 42 mak sei sofre mal nutrisaun.
“Mal nutrisaun la’os de’it dehan menus ai-han, maibe impaktu mos husi moras hipertensia, moras infeksaun, inklui mos hahan ne’ebe la tuir standard,” hateten Vise Ministra Hanjan.
Responsavel ba Mal Nutrisaun iha Sentru Saúde Formoza, Dili, Isabel Lilis hatetn, pasiente mal nutrisaun ne’ebe registu iha sentru saúde ne’e maioria labarik ho idade tinan lima ba kraik. Hamutuk rejistu ona kazus 59.
“Maioria labarik sira ne’e nia todan kilograma hitu ba kraik”, hateten Responsavel Lilis.
Nune mos staff Departamentu Malnutrisaun, Ministeriu Saúde, Epifania Deolinda Marques hateten durante ne’e Ministerio halo intervensaun ba kazu mal nutrisaun liu husi fahe hahan Timor Gita, ne’ebe oras ne’e dadaun produz hela iha Railaku-Ermeta.
Nia dehan, hahan hirak ne’e, Ministeriu Saúde distribui ba distritu hotu-hotu liu husi programa SISKA.