Bebe la hemu susu-been kinur, bele hetan mal nutrisaun

Susu been kinur hanesan primeira linha defeza ba bebe sira bainhira moris tanba aumenta bebe nia sistema imune; no susu been kinur riku ho anti-bodi entau bele protese bebe husi infeksaun oioin iha futuru. Maibe kuandu bebe la hemu susu been kinur hosi inan wainhira moris, bainhira sae bo’ot iha futuru bele hetan problemas barak haneasan mal nutrisaun.
“Perigu liu mak inan sira fo susu-been formula, tanba susu been formula nia protein makas tebes kompara ho susu been inan nian, no bebe la tolera entau bebe bele muta, te’e been, kabun bubu. Ho ida ne’e inan sira fo fali be’e entau iha futuru bebe bele hetan mal nutrisaun tanba hahan ne’ebe nia hetan la sufisiente,” hateten Manajer Saude Labarik no Inan, Angelina Fernandes, foin dadauk (25/10) iha Ospital Nasional Guido Valadares (HNGV), iha Bidau, Dili.
Manajer Fernandes hatutan katak susu-been kinur laos fo benifisiu ba deit bebe maibe ba inan-aman no sosiedade hotu tanba bebe saúde diak familia forte. Benifisio ba bebe mak bebe la hetan moras tanba susu-been inan kompletu ho hahan ne’ebe ho nutrisaun diak no fasil atu absorve no livre  husi kontaminasaun no sei ajuda proteze bebe husi moras.
Nia hakturio katak hosi parte seluk susu-been kinur bele fo benifisiu ba inan sira atu redus moras kankru susun no kankru ovario, no kria relasuan diak entre inan ho oan (bebe). Kuandu fo susu-been formula entau relasaun inan ho oan menus tanba susu-been formula ema kualker seluk bele fo.
Kona ba assuntu ne’e Diretor Klinika Bairo Pite (KBP) Doutor Daniel Murphy hateten katak susu-been kinur ne’e inportante duni ba bebe sira ne’ebe foin moris tanba susu-been inan nian iha nutrisaun ne’ebe kompletu atu bele garante saude bebe nian iha futuru.
“Iha ne’e [KBP] kuandu bebe moris fo kedas ba inan sira susu kedas,” dehan Dr. Murphy.
Doutor ne’e hatutan katak problema bo’ot mak inan sira kuandu ba servisu entau la biban fo susu ba bebe entau inan sira fo susu-been formula.