- Publika iha: 28 Novembro 2011
Moras ISPA (Infeksaun Sistema Respiratoriu) sei kondisaun saude dominante iha Centru Saude Comoro (SCS) ho numeru 17413 kazu rejistadu husi fulan Julho to’o Otubru 2011 tanba komunidade menus konsensia atu hamos abiente.
Kondisaun ISPA laos deit rejistu aas iha CSC deit maibe iha Hospital Nasional Guido Valadares (HNGV) no klinika privado sira iha cidade laran no moras ne’e afeta liu ba labarik sira.
“Tanba komunidade nia konsensia sei minimu tebes. Moto [Ministeriu] Saúde nian katak Saúde Iha Ita Nia Liman Rasik, entau alende halo tratamentu ba pasiente sira pesoal saúde mos halao promosaun, katak fo edukasaun, ba komunidade sira atu hado’ok aan husi moras. Maibe na realidade atitudi komunidade nian la iha mudansa katak soe foer arbiru deit hamosu moras oioin,” dehan Responsavel CSC Comoro, Abel dos Santos semana kotuk (8/11) iha CSC, Comoro, Dili.
Moras ne’ebe registu aas mos iha CSC mak moras seluk hanesan diareia ho numeru 2443; moras kulit ho numeru 1611; Malaria numeru 709 kazus; Malnutrisaun 563 kazus, scabies 490 kazus, STI 445 kazus ho idade tinan liman ba leten, Pneumonia 155 kazus, Tubercolose (TBC) 147 kazus, no moras tanba asidenti 108 kazus.
Reprezentante Dos Santos hatutan atu prevene moras sira ne’e presiza komunidade nia konsensia katak labele soe foer arbiru tanba agora dadaun tama ona iha tempu udan entau moras sira ne’e sei sae makas no fase liman bainhira han no mos nia hateten atu populasaun labele tafui kaben tasak arbiru. Moras infeksaun sistema respiratoriu ISPA moras ne’ebe perigozu tebes ba labarik sira nia saúde bainhira la halo tratamentu sedu.
Nia informa mos katak iha CSC menus aimoruk mear hanesan aimoruk Cotrimoxazol maibe la impede servisu CSC nian tanba iha aimoruk Parasetamol ne’ebe bele fasilita.
Konaba profesional saúde nia hateten katak sufisiente atu atende pasiente sira iha CSC.
Iha parte seluk komunidade Rosantina Da Costa hosi Comoro, Dili, hateten katak moras ISPA kontinua aas kompara ho moras seluk rejistu iha centru saude no klinika privadu iha capital laran halo pesoal saude hot-hotu prekupa ho moras ne’e. Nia rekonhese katak moras sira ne’e mai husi komunidade rasik tanba taka tilun bainhira pesoal saude fahe informasaun.
“Moras sira ne’e mosu tanba ita komunidade sira finji tilun diuk bainhira pessoal saude fahe informasaun iha bairo-bairo katak hamos ambiente no fase liman bainhira han. Pessoal saude nafatin ho moto katak saude iha ita nia liman rasik entau komunidade mak tenke iha konsensia atu prevene moras sira ne’e,” dehan komunidade Da Costa.