- Publika iha: 28 Novembro 2011
Tuir dadus ne’ebe Sala Maternidade Centru saúde Comoro (CSC) iha katak iha fulan Outubru no Novembru, inan partus nain 13 transfere ba iha Hospital Nasional Guido Valadares (HNGV) ho kondisaun komplikadu tanba inan partus hetan moras Hipertensaun nune katak la iha forsa atu fo partus ba bebe ka posizaun bebe la diak iha inan nia kabun laran.
Inan partus ne’ebe tama iha sala maternidade hamutuk nain 23 kompustu husi fulan Otubru nain 20 komplikadu nain 12; no fulan Novembru nain tolu, kazus komplikadu rua.
“Liu husi media ne’e ami husu ba komunidade ne’ebe hela iha area Dom Aleixo hanesan Comoro, Raikotu, Tasi Tolu, Fatuhada, Kampung Alor ne’ebe atu partu la persiza lao do’ok ba hospital Nasional guido Valadares ou lalika partu iha uma maibe mai deit iha Centru Saúde Comoro la selu gratuita no durante 24 oras inkui mos loron feriadu,” dehan Xefe CSC, Abel dos Santos, (8/11) iha knar fatin, Comoro, Dili.
Nia hatutan katak iha CSC iha enfermeira no medikus ne’e sufisiente maibe problema mak menus parteira atu atende inan partus sira. Iha sentru ne’e iha parteira nain sia.
Xefe dos Stantos informa tan katak problema parteira sira hein deit tanba prosesu rekrutamentu agora iha ona Komisaun Funsaun Publika.
Iha fatin hanesan, Parteira Emilia Ayati de Sousa, hateten katak durante sala maternidade CSC seidauk iha parteiras fo ajuda partu inan isin rua sira iha uma bainhira familia bolu.
“Iha fulan Outubru 2011 ne’e mak loke uma maternidade ami komesa fo ajuda partu maibe bainhira seidauk iha uma maternidade ne’e komunidade sira bolu ami ba ajuda partu iha sira nia uma,” dehan Parteira Ayati.
Nia hatutan katak moras Hipertensaun perigozu tebes ba inan isin rua sira bainhira atu partus tanba ne’e mak uma maternidade transfere inan partu komplikadu ba iha HNGV tanba centru saude Comoro la iha Doutor espesialista atu atende.
“Kuandu inan isin rua ho moras Hipertensi bele afeta ba inan no bebe bainhira ian isin rua. Hipertensi presiza doutor sira mak akompania partu tanba iha ne’e doutor laiha entau ami la bele fo partu. Ami parteira so fo partu ba inan isin ho kondisaun normal.”
Iha oportunidade ne’e Parteira hato’o informasaun ba komunidade hotu liu-liu komunidade ne’ebe hela iha Dom Aleixo bele mai partu iha sala maternidade CSC durante 24 oras no loron Segunda to’o Domingo no mos loron-feriadu atende nafatin ba inan sira ne’ebe atu partu.