- Publika iha: 19 Dezembro 2011
Atu minimiza profesionalis saúde sira husi estranjeiru iha rai laran no redus tranferensia moras ba rai liur Estado Timor-Leste liu husi Ministerio Saúde (MS) iha inisiativa atu oferese oportunidade ba mediku geral Timoroan lubuk ida atu ba kontinua sira nia estuda iha Indonesia no nasaun seluk konaba mediku espesialista ba moras oin-oin ne’ebe iha.
“Ita hotu hatene Ministerio Saúde haruka ona ita nia mediku jeral Timoroan sira ba foti espesialista iha Indonesia hanesan universidade Bali Udayana para depois ita bele prense iha ospital sira iha rai laran tanba ospital sira tenke minimu iha espesialista nain hat entau agora ita hahu forma no prepara ona espesialista Timoroan sira. Ita labele depende deit ba brigada estranjeirus sira, tempu ida ita kaer rasik ita nia ospital sira,” hateten Director Geral (DG) MS, Agapito da Silva Soares, semana kotuk (14/11) iha knar fatin iha Caicoli, Dili.
Tuir DG Soares katak iha tinan 2015 mai formadu sira ne’ebe agora dadaun halao hela estudu espesialista iha Indonesia bele ona prense fatin sira ne’ebe mamuk, no katak rai laran presiza espesialista oin-oin hanesan espesialista fuan no ba matan nian.
“Ita tenke hanoin Timor-Leste tenke dezenvolve nafatin atu iha duni espesialidade ne’ebe diak atu bele redus transferensia moras ba liur tanba ita nia kapasidade iha sub-espesialidade ne’e laiha mediku jeral ne’e iha. Tanba ne’e mak presiza forma espesialista Timoroan sira se lae tinan ida ita haruka moras ba ema nia rain entau osamentu hira mak ita investe ba ema nia rain,” hateten DG Soares.
Nia hatutan katak mediku estranjeiru sira labele hela metin iha Timor–Leste no tempu ida sira nia mandatu brigada hotu.
Oras ne’e dadauk aproximadamente doutores jeral 100 mak halao sira nia estudus espesialidade iha Indonesia. Iha part seluk DG Soares mos rekuinese katak Timor–Leste sei presiza mediku espesialista estranjeiru sira nia tulun no mediku jeral sira sei presiza iha area formasaun nian hanesan dosente tanba Timor-Leste foin prepara. Alende rekursu umanu ekipamentus no fasilidade mos inportante.
Entretandu Deputado Fran¬¬¬cisco Jeronimo, Komisaun F, ne’ebe trata kona asuntu Edukasaun, Saúde no Kultura iha Parlamentu Nasional, konkorda ho planu ne’ebe MS iha atu haruka mediku jeral Timoroan sira atu foti espesialista iha Indonesia tanba ne’e inportante tebes tanba Timor–Leste iha deit mediku geral maibe espesialista laiha la diak ba rai laran nia sistema saude nian.
“Mediku geral ita iha ona maibe ita mos presiza mediku espesialista atu atende moras sira ne’ebe presiza mediku espesialista sira hanesan opera ikus mai ita labele husu beibeik doutor espesialista sira iha liur maibe ita bele iha doutor espesialista rasik atu bele fo asistensia ba ita nia povu sira. Haruka ona iha tinan kotuk maibe se haruka tan ne’e diak liu atu bele reforsa servisu Ministerio Saúde liu-liu iha ospital sira ne’ebe fo asistensia ba operasaun nian,” hateten Deputado Jeronimo.