- Publika iha: 19 Dezembro 2011
Tinan-tinan tempu udan ona moras oin-oin mak liu-liu moras dengue no atu kuidadu didiak saude labarik sira nian Ministeiru da Saude (MS) servisu hamutuk ho komunidade Caicoli hala’o limpeza jeral ba valeta nakloke iha area ne’eba.
Funsionario MS, Zeronimo Benevides hateten katak atu hado’ok labarik sira husi moras iha tempu udan, laos inan-aman nia servisu deit presija mós hetan atensaun husi Ministeiru ne’ebé relevante, tan ne’e funsionario MS tomak iha ona planu atu hala’o servisu hamutuk ho komunidade sira liu husi hala’o limpeza.
“Ami hala’o limpeza ida ne’e ho ninia obzektivu maka hado’ok labarik sira husi moras, liu-liu moras dengue, tanba iha tempu udan ne’e susuk mós barak, ami halo limpeza iha bairo, hamos baleta kuak, hanorin sira hamos uma oin ne’ebé mak bele halo susuk tolun,” hateten MS funsionario Benevides, semana kotuk (18/11) iha Cacoli, Dili.
Tuir funsionario MS ne’e katak valeta barak iha capital Dili laran nakonu ho foer, no ida ne’e sai risku bo’ot ba saude komunidade liu-liu ba labarik sira.
Nia hatutan tan katak problema ne’e akontese tanba ema barak laiha konsiensia hodi soe foer arbiru hodi halo valeta intupidu wainhira tempu udan.
Komunidade Sucu Caikoli ne’ebé hela besik valeta ne’ebé nakonu ho be’e foer no foer perkupa ho sira nia oan nia saude nune’e husu ba MS atu halo a’as baleta.
Iha fatin hanesan Olga Abrantes nudar komunidade hateten nia parte kontenti servisu hamutuk ho funsionariu Saude tanba liu husi servisu hamutuk ida ne’e bele hado’ok labarik sira husi mora.
“Ami perkupa tebes ba ami nia oan sira nia saude wainhira iha tempu udan, tanba fatin ne’ebé mak ami hela ba ne’e besik baleta kuak ne’eb’e mak nakonu ho foer. Ida ne’e fo impaktu ladiak ba saude labarik sira nian,” hateten komunidade Abrantes.
Nia mos husu ba ema ida-ida nia kosiensia atu labele soe foer arbiru wainhira iha tempu udan tanba atu soe foer governu komesa tau ona fatin lixu iha dalan ibun iha capital laran.
“Governu ida ne’e semana-semana sempre halo limpeza maibé povu mak nunka iha hanoin ida katak servisu hamutuk ho governu hala’o limpeza jeral diak ba ita nia saude, liu-liu ba labarik sira,” tenik nia