Ospital Ainaro menus aimoruk, tanba tarde hatama lista ba MS

Relasiona ho Ospital Ainaro ne’ebe oras ne’e dadaun infrenta menus aimoruk, tuir Xefe Departementu Farmasia Ministeriu Saude (MS), Antonio Ximenes,katak tanba Diretor ospital tarde halo lista ba MS.
“Lolos hanesan ne’e Diretor tenke halo lista lais antes stok aimoruk hotu,”hateten Xefe Departementu Farmasia, Antonio Ximenes, semana kotuk iha Kaikoli,Dili.

Atu responde ba problema ne’e, oras ne’e dadaun MS halo ona kompras emerjensia husi Indonezia e espera katak bele to’o iha tempu badak nune’e bele distribui ona ba iha ospital refere.

“Kuandu aimoruk ne’e to’o mai entaun ami langsung distribui, para parteira sira bele uza hodi fo atendimentu ba pasiente sira iha ospital ne’eba,” nia dehan.

Antonio hatutan, nia parte haruka ona supervisor nain ida hodi tun ba iha ospital Ainaro,Manufahi,Maubesi hodi halo monitorizasaun ba stok aimoruk ne’ebe menus.

Entretantu tuir Diretor Ospital Ainaro, Hilario Ramos da Silva, katak stok aimoruk ne’ebe menus mak hanesan aimoruk dexa, hibocoben, cotrin, amoxilin no parasetamol.

Iha parte seluk Deolinda dos Santos,komunidade distritu Ainaro ne’ebe TDW hasoru iha terminal Hali-laran hateten, nia parte sente triste ho sotk aimoruk ne’ebe menus iha Ospital Ainaro tanba impede ba komunidade atu hetan tratamentu.

“iha hospital ne’eba aimoruk menus duni liu-liu labarik sira moras hanesan diarea,malaria,asma,ispa no moras sira seluk e ita hein fali to’o loron rua ka tolu entaun fo impakto bo’ot ba labarik sira nia saude,” nia preokupa.

Tanba ne’e nia parte husu ba MS oinsa para buka solusaun ba problema ida ne’e.