Presiza hasa’e liu tan educasaun sivica iha instituisaun F-FDTL

Publika iha: 13 Abril 2012

Xefe Estadu Maior Falur Rate Laek, dehan presiza hasa’e liu tan edukasaun sivika iha Instituisaun F-FDTL, atu sira bele hatene liu tan sira nia knar ho diak.Atu Membru Forsa Defeza Timor-Leste (F-FDTL) bele halo atuasaun ho diak liu tan no bele hadomi povu, Instituisaun F-FDTL presiza hasa’e liu tan edukasaun sivika ba membru sira.

“Forsa nia tradisaun ne’e povu maka fo forsas, tanba ne’e maka ami nia esforsu hotu-hotu halo para forsa ida ne’e tenki hanesan buat ida nebe maka povu fiar, povu hadomi, para atinzi objective ida ne’e prezisa edukasaun no buka formasaun oin-oin para tuir, atu hasae tan edukasaun sivika alende treinamentu,” hateten Xefe Estadu Maior Falur Rate Laek, semana kotuk, (03/04) iha inagurasaun edifisiu Ministeriu Defeza, Fatu-Hada, Dili.

Tuir Xefe Estadu Laek, edifisiu foun ba F-FDTL ne’e kapas tebes atu kapasita membru sira halo nia knar diak liu tan iha future.
“ Kontente tebes hetan edifisiu foun ne’e, maibe agora komu foun ita tenki eduka an para depois uza edifisiu ida ne’e ba afavor ba interese nasaun nian,” dehan Xefe Estadu Maior Laek.

Iha fatiin hanesan Minstru Negosiu Estranjeiru (MNE), Zacarias Albano da Costa, dehan la fasil atu halo buat ida ho lalais liu-liu, liu-liu kona ba atuasaun ho profesionalime membru F-FDTL nian, presiza tempu nebe maka barak no neneik-neneik.

“Hau hanoin F-FDTL hatene katak forsa ida ke la’os iha tinan ida, la’os iha tinan sanulu maka ita halo nia hanesan forsa ke masimu, 100% professional ne’e lae, ne’e hau hanoin Brigadeiru Major Lere Anan Timor mos dehan katak importante ita hadia neneik-neneik para loron ida ita bele dehan katak ita nia forsas sira professional,” dehan Ministru da Costa.

Tuir nia importante maka kria kondiseons nebe maka diak ba membru F-FDTL tomak atu nune’e sira mos sente kontente atu halo’o sira nia servisu.

“Kondisoens maka ita kolia konaba infrastutura legal, no infrestutura civika e ita kolia mos konaba condiseons lojistika tenki iha, kuandu edifisiu ne’e ba komando, agora F-FDTL la’os deit iha Metinaro deit, F-FDTL iha Baucau iha fatin sira seluk, ita tenki buka no kria kondisoens nebe maka diak para dezempheña halo sira nia knar ho diak,” Ministru da Costa espera.