- Publika iha: 19 Abril 2012
Tuir Prezidente da Republika Jose Manuel Ramos Horta,katak kualidade ne’ebe mak forsa labele lakon mak tenke iha kualidade umanismu.“Hau nia liafuan importante mak ne’e ita bele iha edifisius, ita bele iha training oin-oin maibe kualidade ida ke forsa labele lakon, mak forsa tenki kaer kualidade ita nia umanismu,” hateten Prezidente Horta, semana kotuk (03/04) iha serimonia inagurasaun edifisiu foun F-FDTL nian iha Fatu-hada, Dili.
Xefe Estadu Horta hatutan, forsa tantu polisia ga forsa armadas, ejiste atu defende povu, tanba ne’e povu mos tenke fiar instituisoens sira ne’e.
Prezidente Horta mos husu ba F-FDTL, tenki kria kondisaun nebe maka diak atu nune’e povu bele halo’o sira nia aktividade ho seguru.
“Povu bele ba to’os no povu bele toba hakmatek iha tempu kalan no labarik sira ba eskola hakmatek, ne’e mak signifikadu liu ba forsas armadas,” dehan Xefe Estadu Horta.
Tanba tuir Prezidente Horta, kuandu forsas la respeita direitu dignidade povu nian, sira sei fraku.
“Ita bele kaer kilat oin-oin, bele iha lei hotu-hotu, maibe sei ita nia komportamentu la diak ba povu no ba sosiadade, sei ita la respeita direitu dignidade povu nian, ne’e forsas sei sai fraku tanba nia laiha tanen mai husi povu,” katak Prezidente Horta.
Iha fatin hanesan Komandante Jeral F-FDTL, Xefe Estadu Maior Jeneral Lere Anan Timor dehan, forsas tenki hamutuk ho povu hodi defende povu nia direitu.
“kultura ita nia forsas ninian, ita hatene katak ita nia forsas actual mai husi Falentil Forsas Armadas iha Timor-Leste, sira moris ho povu maka ita manan ita nia funu, entaun ne’e kultura ida ba ita nia forsa defeza,” dehan Jeneral Lere Anan Timor.
Jeneral Timor katak, F-FDTL tenki marka prezensa iha povu nia leet, atu fo seguransa ba povu, e ida ne’e mak dever nebe sira tenki hala’o.
“Hau nia planu no hau nia hanoin sira (F-FDTL) tenki loron-loron moris ho ita nia povu, hanesan uluk ami dehan katak povu maka bee no forsas maka ikan, ne’e duni ikan ho bee labele haketak malu,” Jeneral Timor afirma.