- Publika iha: 19 Abril 2012
Relasiona ho membru Polisia inklui mos membru forsas balun uza motor ho knalpot resin halo barulhu iha sidade laran, tuir Adjuntu Komandante Polisia Tranzitu Nasional, Inspektor Valentino da Silva Soares katak polisia no forsas tenke hatudu ezemplu diak ba iha komunidade sira.“Lei ne’e serve ba ema hotu-hotu, no ema hotu-hotu tenki hakruk ba lei ne’e, sera ke nia sidadaun ba-bain, sera ke nia membrus polisia ka membrus F-FDTL no membru governu, see deit tenki hakruk ba lei ne’e,” hateten Adjuntu Inspektor da Silva, semana kotuk (10/04) iha Kaikoli, Dili.
Tuir Adjuntu da Silva, wainhira iha membru PNTL no F-FDTL balun kontra lei tranzitu nian, atu evita problema entre sira, Komandante Transito sei refere ba Komandante Provos (Polisia Militar) tanba iha konsensus entre dirasaun rua ne’e.
“Kona ba militar no PNTL ami iha konsensus ida hamutuk ho komandante provos, bainhira kuandu iha estrada publiku maka sira kontra oituan, duke ami entre polisia ho polisia mak diskuti malu, ne’e ladun diak maibe ami ba aprezenta tiha iha komandante provos no sira military ami mos iha servisu hamutuk nebe maka iha mos consensus ho Komandante Polisia Militar,” katak Adjuntu da Silva.
Entertantu Membru Komisaun B Parlamentar, Deputadu Paulo Fatima Martins hateten, lei tranzitu aplika ba ema tomak, se deit mak sirkula iha Estrada publiku, polisia tranzitu mak kontrola.
“Implementasaun lei validu ba ema tomak, see deit karik membru PNTL no F-FDTL sira maka uza knalpot resin, lei ne’e implementa ba sira hotu,” hateten Deputadu Martins.
Tanba ne’e tuir nia, polisia no F-FDTL tenki sai ezemplu nebe maka diak, maibe kuandu sira mak viola fali lei ne’e, tenki selu multa tuir lei nebe maka figora tiha ona.*