- Publika iha: 19 Abril 2012
Kordenador Treinamentu Calilo Alves, hateten hare ba idade nasaun Timor-Leste ne’ebe sei nurak, fasil atu monu ba tentativa trafiku umanu, tanba ne’e maka IOM halo treinamentu hanesan meios prevensaun, hodi sidadaun la bele sai vitima.
‘’Ita nia nasaun ne’e sei joven hela, fasil atu hetan tentativa pratika trafiku umanu, tanba ne’e maka ami halo treinamentu ba instituisaun governo, sosidade sivil atu nune sira mos bele haklaken fali ba ita nia komunidade,” dehan Kordenador Alves,semana kotuk (09/13) iha Oe-Cusse.
Tuir Kordenador Alves, IOM atende ona kazu Trafiku Umanu 30 resin, kompostu husi kazu trafiku uma nivel internasional no iha rai laran, e kazu tolu seidauk hetan konfirma lolos.
“Maibe ne’e la’os dadus jeral, se jeral presiza halo estudu klean iha teritoria laran,” dehan Kordenador Alves.
Iha fatin hanesan Komandante Polisia Distrito Oé-Cusse, Superintendente Mateus Acencão Mendes ne’ebé partisipa iha treinamentu ne’e dehan, treinamentu ne’e importante, atu haklean liu tan konesementu, nune’e wainhira mosu kazu trafiku umanu bele atende ho professional.
‘’Kapasitasaun ne’e importante, atu nune’e bele aumenta esperiensia hodi nune mosu trafiku umanu bele atende ho professional,” Komandante Mendes hateten.