Deputadus la tama servisu, korum la iha, parlamentu la bele diskuti Lei Reparasaun ba Vitimas 1975-1999.Maske lei reparasaun ba vitima husi 1975 to’o 1999 tama kleur ona iha Parlamentu Nasional (PN) no tau ajenda dalabarak ona maibe to’o agora seidauk aprova tanba ho razaun korum la to’o atu halo diskusaun ba lei ne’e.

“Horbainhira desidi tiha ona iha Parlamentu dehan,atu debate no aprova no ajenda dala hira ona maibe korum mak lato’o hela deit,” hateten Deputadu Bankada Opozisaun Fretilin, Francisco Branco ,semana kotuk (10/04) iha Uma Fukun Dili.
Tuir Deputadu Branco, nia seidauk hatene bainhira mak Parlamentu bele aprova lei ne’e maibe lei ne’e tau ona ajenda meja PN nian.

Entertantu Deputadu Bankada Cobgresu Nasional Rekonstrusaun Timor (CNRT), Paul Martins hateten, lei reparasaun ne’e sei suspende hela iha Parlamentu tanba problema veteranus ninian seidauk rezolve hotu.
“Iha ami nia mandate ida ne’e la aprova ona, maibe iha mandate tuir mai bele halo,” dehan Deputadu Martins.
Tuir nia, la’os Parlamentu la fo importansia ba lei ne’e, maibe depois de sira nia problema resolve tiha, bele aprova ona.