- Publika iha: 07 Maio 2012
“Iha 2010 assidente ne’ebe maka ami deskreve, ema mate hamutuk 76, kanek todan 391 pessoas, no kanek kma’an hamutuk 1.509, husi tinan 2011 mate hamutuk 72, kanek todan hamutuk 339, no kanek kma’an hamutuk 1.329,” dehan Fundasaun Mahein nia Peskizador Joao Almeida Fernandes, semana kotuk, (27/04) iha Balide, Dili, no bazeia ba peskiza FM halao foin lalais ne’e.
Tuir nia, kauza husi asidente sira ne’e, balun tanba Estrada aat no balun mos tanba falta de kontrolu husi polisia tranzitu nian.
“Estrada kuak, no laiha sinais transitu no fatin sira ne’ebe indentifika hanesan risku ba seguransa, trafiku la monta sinais ruma,” dehan Peskizador Fernandes.
Entertantu Komandante Interino Polisia Transito, Valentino da Silva Soares, dehan, kompara ho nasaun sira seluk iha mundu, numeru asidente trafiku Timor nian bo’o t liu.
”Asidente ne’e iha mundu ne’ebe deit sempre iha assidente, mais hare ba numeru ita nian ne’e dalaruma bo’ot kompara ho nasaun sira seluk ne’ebe ita bele hatete tranzitu iha ne’e seidauk susesu,” dehan Komandante Interino Soares.
Tuir nia, iha fator tolu mak kauza ba asidente ne’e akontese mak, fator umanu, fator natureza, no fator kondisaun kareta.
“Maibe fator determinante kauza asidente mak fator umanu, kompara seluk,” Nia katak.