- Publika iha: 07 Maio 2012
“Sessenta e duas (62) pessoas ne’e labele halo responde diak ba seguransa traffiku nian,” dehan Peskizador FM, Joao Almeida Fernandes Fernandes, semana kotuk (27/04), iha Balide, Dili.
Tuir nia, ho problema rekursu umanu ne’ebe polisia tranzitu iha, numeru asidente trafiku aumenta.
“Ezemplu hanesan assidente ida iha Becora, depois nia fo hela atendementu iha neba, iha oras hanesan mosu mos assidente seluk iha Comoro, polisia labele fo atendementu tanba rekursu laiha, ema lato’o,” Nia fo ezemplu.
Entertantu Comandante Interino Polisia Transito (PT) Valentino da Silva Soares, rekonese katak, ne’e hanesan diffikuldade ida iha sira nia servisu.
“Los duni katak membrus polisia tranzitu ne’e limitadu, ami iha parte tranzitu mos sempre kestiona kona ba ida ne’e, no ami hato’o ona kestaun ne’e ba ami nia komandante, oinsa atu aumenta tan personil tranzitu nian,” rekonese Komandante interinu Soares.
Nia espera katak, polisia foun ne’ebe oras ne’e tuir hela treinamentu, depois de remata, balun sei aloka iha tranzitu nian.