- Publika iha: 30 Maio 2012
Ho realidade kazu violensia seksual ne’ebe akontese ba feto sira iha rai laran balun to’o mate, maibe dalabarak suspeitu sira livre, no feto kontinua sai vitima e Polisia Unidade Vulneravel (VPU) susar atu detekta ho razaun laiha fasilidada.“Ita iha ona polisia VPU tenke fo fasilidade ba sira atu hala’o knar ho diak atu bele halo investigasaun ne’ebe konkretu, nune’e suspeitu sira labele livre. hau lamenta tebes tanba violasaun seksaul barak hasoru feto to’o mate maibe rezultado ladun diak,” lamenta Prezidente Grupu Feto Parlamentar Timor-Leste (GMPTL), Deputada Josefa Alvares Soares, (11/05), iha Uma Fukun, Dili.
Nia hatutan, GMPTL asina ona proposta ida atu aumenta orsamentu do estado hodi hola fasilidade ba polisia VPU sira, atu bele fo protesaun ne’ebe diak ba feto no labarik sira hanesan transporte , makina detekta hetan konkordansia husi parte governu osamentu hamutuk $5 mil atu hola alat detekta, $12 mil ba kareta.
Iha parte seluk Komandante Polisia VPU, Daria Ximenes hateten durante ne’e polisia VPU sempre atende kazu hotu hasoru feto no labarik, maibe konaba prosesu tarde ne’e tanba dezisaun husi tribunal entau polisia bele kaer suspeitu.
“Los durante ne’e ema barak preokupa ho servisu polisia VPU nian katak tanba sa suspeitu lao livre hela maibe hau bele dehan polisia VPU labele halo buat ida se laiha orden husi tribunal ami atu kaer direita labele , durante ne’e ami nunka pendi kazu iha ne’e,” dehan comadante Ximenes, (15/05) iha knar fatin Kaikoli Dili.
Nia hatutan katak konaba fasilidade liu –liu transporte sufsente ona tanba iha fulan kotuk liu ba governu supporta ona kareta hamutuk 13 ba polisia VPU no aloka ona ba 13 distritus maibe problema membru polisia sira mak uza latuir funsaun katak kareta uza fali husi polisia investigasaun. Konaba fasilidade makina detekta kazu violensia seksual, fisiku no seluk tan VPU seidauk simu.