- Publika iha: 31 Maio 2012
Prizaun Gleno ne’ebe maka ofere de’it ba feto, tanba feto prizioneira presiza fatin ne’ebe maka hakmatek, atu sira bele halo reflesaun ho hakmatek, no bainhira sai husi prizaun bele hadia sira nia moris ho diak liu tan.
“Fatin prizaun Gleno ne’e aman liu ba maluk feto sira, no populasaun iha Gleno ki’ik liu duke iha Becora ne’e, iha Becora ne’e mesak mane de’it wainhira sira kahur malu ladun diak, ne’e duni Gleno fatin ne’ebe maka diak ba feto,” hateten Cordenador Programa Peace Building/Community and Family Violence Prevention Program (PB/CFVP), Fernando Pires, semana kotuk (22/05), iha Prizaun Becora, Dili.
“Sira mos halo produtu ne’ebe depois bele fa’an, fo benefisio ba sira nia an rasik, no ba prizaun Gleno, protesaun ba sira mos iha no kapas,” tenik Kordenador Pires.
Entertantu Prezidente Grupu Feto Parlamentar (GMPTL), Deputada Josefa Alvares Soares, dehan feto sira ne’ebe iha prizaun Gleno ne’e, la’os sulan deit sira maibe mos halo rehabilitasaun ba sira.
“Fatin ne’e hanesan rehabilitasaun ba ema ne’e rasik, rehabilita sira atu bele sai fila-fali ema diak bainhira sira fila ba iha komunidade, tanba ne’e maka foti sira tau ba iha do’ok ne’eba, atu sira bele halo reflesaun ba sira nia an,” dehan Prezidente GMPTL, Soares.
Tuir nia, iha Gleno diak liu ba feto sira para bele refleta no kurizi sira nia an, prizioneira feto sira presiza fatin ne’ebe maka kalma, atu nune’e sira bele hanoin fali sira nia sala sira, no hadia moris diak liu tan wainhira sai husi prizaon.