- Publika iha: 16 Julho 2012
“Presiza kria Autoridade Nasional Maritima, tanba sira nia koordenasaun servisu ne’e integradu, agora kordenasaun servisu iha ne’eba ne’e iha Polisia Maritima, iha Komponente Naval, iha Alvandega, iha karantina, no iha imigrasaun, antaun ANM hanesan sentru ida atu hare kona ba kestaun sira ne’e,” sujere Kordenador Peskiza Fundasaun Mahein (FM), Joao Almeida Fernandes, iha Balide, Dili.
Tuir nia, durante ne’e politikamente iha ona maibe seidauk tau iha pratika.
Nia hatutan, ANM ne’e imporante nune’e bele kontrola sasan sira ne’ebe maka tama iha rai laran, liu-liu sasan sira nebe mak lei inan bandu, labele tama iha Timor-Leste.
Entertantu Deputadu Joaquin Amaral, presiza duni kria ANM maibe tenke iha rekursu humanu ne’ebe sufsiente ba atu servisu iha area ida ne’e.
“Ita nia sumber daya manusia maka seidauk to’o ba ida ne’e, tanba hau tauk ne’e orsida autoridade ne’e nia kompetensia bo’ot liu, maibe atu ezekuta nia kapasidade ne’e ki’ik liu, entaun orsida miss understanding mak barak liu. Ne’e duni labele ansi ita haruka ita nia ema sira ne’e ba eskola lai no foti formasaun,” Deputadu ne’e duvida.
Deputadu ne’e esplika, ANM nia funsaun mak atu superviziona autor ou agensia sira ne’ebe mak servisu iha tasi, e membru ANM ne’e rasik kompostu husi Sosiadade Sivil, Deputadu sira no Polisia Maritima no husi Forsa naval.