- Publika iha: 24 Julho 2012
Tribunal Distrital Dili (TDD) hahu halo julgamentu ba kazu tuda taxi ne’ebe akontese iha 19 Fevereiru 2011 iha Balide, Dili.Iha julgamentu ne’e Vitima (taxi nain) ES deklara, iha altura ne’e vitima para hela nia taxi iha fatin ne’eba, e iha grupu balun hemu hela tua, depois lanu sira tuda taxi ne’e to’o aat hotu.
“Hau la hatene problema, bain-bain hau para hau nia taxi iha fatin ne’eba, maibe iha tempu ne’e sira halo problema no tuda fali hau nia kareta halo estragus aat los,” deklara Vitima ES, iha Tribunal Distrital Dili (TDD), iha Mandarin, Dili.
Hare ba taxi ho kondisaun ne’ebe aat los, Vitima ES hato’o keixa ba iha Servisu Investigasaun Criminal (SIC).
“Kalan ne’e kedas hau ba kesar iha polisia no polisia mos ba kedas iha fatin ne’e hodi halo investigasaun no prosesu mos kontinua to’o iha tribunal,” dehan Arguidu ne’e.
Entretantu Arguidu AF rekonese katak nia hela duni iha fatin ne’eba, maibe kona ba kazu tuda taxi, arguidu rezeita no la’os nia mak tuda.
“Hau foin fila husi servisu, hau kolen no toba, maibe iha liur istrundu los no derepenti tuda fali hau nia uma, hau nia kaben no hau nia oan sira hakfodak hotu, ne’e duni hau sai ba liur no dehan nusa mak imi tuda hau nia uma,” dehan Arguidu AF.
“Ema barulhu no komesa halai ba halai mai, hau komesa buka hau nia oan, depois hau nia kolega ida mai hateten katak, taxi nain ba kesar maun iha polisia katak maun maka tuda nia taxi, ne’ebe hau dehan husik nia kesar, ba tribunal maka hau hatan,” Arguidu ne’e deklara.
Enkuantu julgamentu ne’e rasik diriji husi Juis Prezidente Antonio Elder, Jose Maria, Antonio Gomes, no Reprezentante husi Ministeriu Publiku Prokurador Domingos Barreto no Arguidu hetan defeza husi Advogada Marcia Sarmento.
Hafoin rona tiha deklarasaun husi Arguidu no Vitima, Juis Pezidente deside katak Arguidu sei fila fali mai tribunal iha 30 Julhu, tuku 02:00 lokraik, hodi rona rezultadu final.