Terça, Novembro 24, 2020
Total visitors: 536534

Polisia Nasional Timor-Leste (PNTL) submete ona autor rama ambon nain 8 ba prizaun preventiva iha Becora, hodi responsabilidade ba akto krime ne’ebe mak sira halo hanesan uza arma braka hodi hakanek ema seluk nune’e mos tentativa homesidio.

Polisia Nasional Timor-Leste (PNTL) submete ona autor rama ambon nain 8 ba prizaun preventiva iha Becora.

Komandante Polisia munisipio Dili, Superientendente Xefe Henrique da Costa hateten, autor sira ne’e mak durante ne’e halo movimento iha kapital Dili laran ho rama ambon hodi hakanek ema seluk iha parte Comoro, Pantai Kelapa, no Maskarenhas, nune’e mos fatin seluk tan.

“Autor hirak ne’e ita nia serviso informasaun identifika, no halo kapturasaun antes ne’e submete ona ba sela detensaun 72 oras, depois aprezenta ba ministerio publiku hodi submete ba primeiro interogatorio, hodi submete liu ba prizaun preventiva,” Superientendente Xefe Costa hateten.

Nia dehan, autor rama ambon iha Dili balun sei iha, no sei kuntinua halo movimento hodi hakanek ema, maibe PNTL avizu katak sira sei la ses husi justisa.

“Autor rama ambon sira durante ne’e PNTL submete ona nain 8 ba prizaun preventiva iha Becora,” Komandante Munisipio Dili Costa dehan.

Nia dehan, autor hirak ne’e komete krime rua hanesan arma branka lei numero 5/2017 nune’e mos tentativa homesido, pena prizasaun tenke aplika tuir lei kodigo penal.

“Tanba ne’e ita husu ba joven sira, karik iha problema privado ruma, buka malu rezolve, la’os hein maluk iha nakukun hodi hana malu ida ne’e hatudo hahalok ne’ebe mak la edukado, komete krime no polisia sei la husik imi livre husi justisa,” nia hateten.

Enkuanto nia dehan, dadaun ne’e polisia kuntinua reforsa serviso patrolio no informasaun hodi kontrola no buka tuir nafatin ema ne’ebe mak kuntinua utiliza rama ambon no krime seluk iha Dili laran.

Iha parte seluk, Diretor Ezekutivo Fundasaun Mahein Joao Almeida hateten, autor rama amobn sira ne’ebe mak submete ona ba prizaun ne’e hatudo katak progresu serviso diak polisia nian liu-liu konaba halo atendimento ba kazu rama ambon.

“Ita husu atu kuntinua halo atendimento ne’ebe mak espesifiku no maneira ne’ebe mak rapido buka tuir tan kriminozo sira ne’ebe mak subar iha komunidade,” Diretor FM dehan.

Nia dehan, tenke reforsa serviso intelijensia halo didiak, hodi kaptura tan autor sira seluk ne’ebe mak sei subar hodi kuntinua akto krime ne’e no limite movimento komunidade.

“Kapital Dili livre husi krime, polisia tenke fortifika serviso vizilansia iha area ne’ebe mak identifika hanesan risku ba violensia, atu identifika area hirak ne’e papel inteligensia importante,” nia informa.

Komunidade Rita Fernandes hateten, hahalok krime ne’ebe joven sira halo ne’e impakto tebes ba sira nia futuru.

“Tempo ida agora ne’e jerasaun foun tenke luta hodi hadia nia futuru no kontribui ba estabilidade iha sosiadade,” Komunidade Fernandes hateten.

Maibe nia dehan, realidade ne’ebe mak iha jerasaun foun sira, kompete fali iha krime, no ikus mai susesu iha komarka, sira haluhan kontribuisaun inan aman nian ba sira durante ne’e, sira haluhan saida mak sira atu halo nune’e inan aman bele kontente.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04