- Publika iha: 16 Outubro 2020
Komando PNTL Munisipio Dili, durante fulan tolu hahu husi fulan Julho to’o Setembro 2020 ne’e prosesu ona kazu violensia domestika (VD) hamutuk 117 ne’ebe akontese iha kapital Dili laran ba Ministerio Publiku (MI) hodi prosesu tuir dalan legal.
Komandante PNTL Munisipio Dili, Superientendente Xefe Henrique da Costa hateten, kazu violensia domestika sira nain 117 refere tenke prosesu tuir dalan legal, tanba ne’e VD krime publiku tuir lei numero 10/2007.
“Tanba ne’e mak durante fulan tolu nian laran ne’e ita prosesu ona kazu VD hamutuk 117 hodi kuntinua prosesu ba tribunal hodi hetan desizaun final,” Superientendente Xefe Costa dehan.
Nia dehan, ba autor ne’ebe mak komete iha kazu violensia domestika tuir kodigo penal sei bele aplika pena prizaun tinan 4 ba leten.
“Ita husu ba komunidade sira tenke konsiente katak, kazu violensia domestika ne’e krime publiku ona, la’os tuir kultura katak bikan no kanuru mak baku malu,” nia hatete.
Tanba ne’, PNTL husu ba komunidade se mak sai vitima ba violensia domestika tenke hato’o keixa ba polisia nune’e bele halo prosesu tuir dalan justisa.
Iha parte seluk, Xefe Suku Kampung Alor, Alcina da Costa do Santos hateten, kazu violensia domestika ne’ebe mak akontese iha suku laran hamutuk nain 7 maibe ne’e hat mak prosesu tuir dalan legal agora dadaun iha ona tribunal, no tolu husi familia dada fali kazu ne’e rezolve tuir adat (tradisional).
“Kazu tolu ne’ebe mak ita rezolve ona tuir adat, ita bolu mos partisipante husi polisia nune’e mos lia nain no ikus mai familia simu malu fali,” Xefe suku Alcina dehan.
Nia dehan, kazu tolu ne’ebe mak prosesu tama ona iha tribunal seidauk hetan rezultado ba prosesu nian.