Migrasaun Kaptura Sidadaun Nasional Nain 50 Iha Fronteira

Polisia Seviso Migrasaun kaptura sidadaun nasional hamutuk nain 50 iha fronteira terestre tanba komete krime kontrabando.

Diretor Jeral Polisia Serviso Migrasaun, Superientendente Asistente Luis Soares Barreto hateten, sidadaun nain 50 ne’e kaptura durante serviso operasaun ne’e mak sira ho Unidade Patrolimento Fronteira (UPF) halo durante fulan Outubro nian laran.

“Sidadaun Nasional nain 50 ne’e ita kaptura tanba komete krime kontrabando iha fronteira terestre,” DJ Bareto dehan.

Nia dehan, sidadaun sira ne’e kaptura iha fronteira Batugade, Salele, no Wini, depois de kapturasaun ba sidadaun hirak ne’e submete kedan ba kuarentena no prosesu investigasaun mos halo ona.

“Ita submete tiha ba kuarentena hodi kumpri 14 dias depois intrega fali mai polisia serviso migrasaun hodi halo prosesu tuir lei konaba sira nian asaun kontrabando ne’e,” nia informa.

Alende ne’e nia dehan, ba sidadaun sira ne’e autoridade seguransa mos aplika sansaun admistrativa ka pena multa hamutuk $30 kada ema, no multa sira ne’e selu deit iha fronteira depois mak lori resibu ho osan ba iha banku.

Entretanto, Komandante Jeral Polisia Nasional Timor-Leste (PNTL) Comisario Faustinho da Costa hateten, sidadaun ne’ebe mak komete kontrabando iha fronteira tenke prosesu tuir dalan legal nune’e bele hatan ba hahalok krime ne’ebe nia halo.

“Maibe antes ita kaptura, ita tenke submete uluk ba kuarentena tuir regras husi Organizasaun Saude Mundial nia katak tenke hela iha kuarentena 14, dias,” Comisario Costa hateten.

Nia dehan, sansaun ne’ebe mak aplika ba sidadaun 50 ne’e alende submete ba Ministerio Publiku, iha mos sansaun admistrativo hanesan selu multa.

“Hahu husi fulan Marsu mai to’o ohin loron sidadaun ne’ebe mak ita kaptura iha fronteira tanba kontrabando kuaze rihun ida resin, husi sidadaun hirak ne’e balun prosesu hotu ona balun iha prosesu nia laran,” nia informa.

Nia dehan, dadaun ne’e iha posto fronteira la’os Unidade Patrolimento Fronteira (UPF) deit mak kontrola maibe komposto husi Komando Polisia Munisipio no FALINTIL-Forsa Defesa Timor-Leste (F-FDTL) hodi halo seguransa iha fronteira.