- Publika iha: 15 Dezembro 2020
Komando Polisia Nasional Timor-Leste (PNTL) orienta komando polisia munisipio sira tenke fo seguransa maximu hodi asegura komunidade sira hodi selebra festa natal no tinan foun.
Komandante Jeral PNTL, Komisario Faustinho da Costa hateten, orientsaun ne’ebe mak komando hatun ne’e ba komando munisipio sira tenke fo seguransa ba kualker aktividade sira ne’ebe mak realiza ligado ba loron natal no tinan foun.
“Komando munisipio sira tenke garante seguransa ba komunidade sira nune’e sira sente seguru hodi ba partisipa selebrasaun misa natal,” nia dehan.
Tanba ne’e nia dehan, natal no tinan foun livre ba komunidade sira atu movimento ba aktividade saida deit tanba polisia pronto asegura komunidade sira iha Timor-Leste laran.
“Dadaun ne’e, ita nia komando munisipio balun mos komesa ona halo serviso cek point ba movimento transporte publiku ka privado sira, labele lori sasan kroat nune’e mos fugetis no tenke kompleta dokumento sira,” Komisario Costa dehan.
Alende ne’e nia dehan, komando munisipio balun mos komesa identifika ona area ne’ebe mak risku ba problema nune’e bele fo seguransa ba komunidade sira iha festa natal tinan foun.
Entretanto, Segundo Komandante Polisia Munisipio Manatuto, Inspektor Domingos Gama Soares hateten, dadaun ne’e komando orienta ona membro sira husi unidade hotu hodi bele fo seguransa ba festa natal no tinan foun iha area juridiku Manatuto nian.
“Ita ekipa patrolhamento no tranzito sira ita destaka ona iha Obrato hodi kontrola movimento komunidade nian liu-liu konaba sasan kroat, fugetis no mos dokumento sira,” Inspektor Gama dehan.
Nia informa tan katak, iha ekipa ida mos kopera ho parte Igreja hodi fo seguransa ba aktividade saida deit mak Igreja sei realiza.
“Aktividade hotu iha apoio seguransa maibe ita sei la autoriza komunidade sira sunu fugetis arbiru nune’e hemu lanu hodi halo barulho,” nia informa.
Tanba ne’e nia dehan, fugetis ne’e autoriza sunu iha dia 24 no dia 31 kalan fora husi ida ne’e la iha autorizasaun se mak obriga sunu tenke prosesu.