- Publika iha: 16 Dezembro 2020
Sekretario Estado Protesaun Sivil (SEPS) kria tan sentro integrado protesaun no sokorru iha kapital Dili hodi fo atendimento ba publiku liu-liu bainhira akontese dezastre natural ruma, inklui atendimento emergensia sira.
Sekretario Estado SEPS, Joaquin Gusmao hateten, sentro integrado protesaun no sokorru ne’e hodi halo atendimento emergensia hanesan nune’e mos halo atendiemnto primeiro sokorru ba komunidade balun karik afeta husi dezastre.
“Sentro integrado protesaun no sokorru ne’ebe ita kria ne’e, ita sei iha mos numero kontakto rasik hodi ofrese ba komunidade sira karik afeta ba dezstre bele kontakto ba sentro nune’e bele halo atendimento emergensia lalalis,” SEPS Gusmao informa.
Nia salienta SEPS kria sentro refere hodi bele halo atendimento ne'ebe mak lais liu iha asunto emergensia nian.
Nia haktuir, SEPS serviso hamutuk ho ekipa ambulancia no Eletrisidade de Timor-Leste (EDTL) hodi Halo atendimento ba asunto emergensia tanto iha Dili laran no inkliu mos munisipio sira.
“Oras ne’e dadaun sentro integrado preparado ona hein deit atu halo atendimento karik akontese dezastre naturais,” nia salienta.
Alende ne’e nia dehan, hein deit atu komunika ho IT husi Timor Telecom hodi kria numero kontakto uniku hodi ofrese ba komunidade sira bele hato’o informasaun bainhira hetan dezastre.
Entretanto, Membru Parlamento Nasional, Deputada Olinda Ximenes hateten, atendimento ba vitima dezastre naturais sira ne’e importante no governo tenke fo prioridade ba asunto ne’e.
“Ita hare hanesan akontesimento dezastre naturais sira ne’ebe akontese iha liu ba atendimento governo nian ne’e tarde liu, tuir lolos atendimento emergensia ne’e tenke rapido no lalais ba ita nia povu sira,” Deputado iha Parlamento Nasional Ximenes dehan.
Nia dehan, foin lalais iha Covalima be’e tama komunidade nia uma no estraga sasan hotu maibe to’o ohin loron komunidade seidauk hetan atendimento no apoio husi governo.
“Tanba ne’e ita husu governo atu realiza plano saida deit tenke responde ba nesedidade povu nian, tanba ita mai kaer ukun ne'e hodi tau matan ba povu no rezolve problema saida deit mak sira hasoru,” Deputada Ximenes salienta.