F-FDTL Prontu Simu Vasina Covid-19 Uluk

Membru FALINTIL-Forsa Defeza Timor Leste (F-FDTL) pronto simu vasinasaun aimoruk Covid-19 uluk husi ministeriu saude hodi kombate prevensaun Covid-19 iha Timor-Leste.

Xefe Estado Maior Jeral F-FDTL, Coronel Calisto Santos "Coliati" hateten, membro instituisaun F-FDTL la iha duvida atu simu vasinasaun uluk iha Timor-Leste tanba vasinasaun ne'e importante ba saude hodi halo prevensaun ba corona virus.

“F-FDTL pronto simu vasinasaun no la iha duvida, militar sempre pronto kualker oras no tempo," Coronel Coliati hateten.

Tanba ne'e nia dehan, militar mak simu uluk vasinasaun ne'e hodi hatudu ba publiku hotu katak vasina Covid-19 ne'e livre husi moras seluk.

"Liu husi koperasaun ministerio saude hamutuk ho WHO realiza sosializasaun ba membro militar sira, oinsa atu komprende diak liu tan konaba prevensaun liu husi vasinasaun ne'e," nia salienta.

Nia dehan, hosi advokasia ne’e bele fohatene ba militar sira para atu komprende didiak konaba programa estadu nian konaba buat vasina.

Iha parte seluk, reprejentante Ministeriu Saude, ofisial programa imunizasaun, Manuel Mausiri hateten, forsa sira hanesan F-FDTL ho Polisia konsidera hanesan parte ida importante, oinsa atu salva saude publiku nian.

Tanba ne’e presiza tebes simu vasinasaun ne’e, bele sai ezemplu ba sosiedade sira oinsa hatene no kumpre regras WHO nian.

“Informasaun globalmente konaba moras Covid, tanba ita fiar ka lafiar kondisaun sira ne’e sei lori ita ba realidade kuandu ita la halo prevensaun agora,” reprezentante Ministeriu Saude Mausiri informa.