Sábado, Junho 19, 2021

Familia uma kain hamutuk 1.500 evakua ba sentro evakuasaun hodi salva vida husi dezastre naturais no husik hela, hela fatin.

Familia uma kain hamutuk 1.500 evakua ba sentro evakuasaun hodi salva vida husi dezastre naturais no husik hela, hela fatin.

Diretor Jeral Protesaun Sivil, Superintendente Polisia Ismail Babo hateten, tuir dadus ne’ebe mak sira rekolha husi familia vitima dezastre hamutuk 1.500 no dadaun ne’e vitima sira sai husi hela fatin no ba hela iha sentro evakuasaun sira.

“Sentro evakuasaun ne’ebe mak familia afetadu hela ba hamutuk 8 inklui, Dom Bosco, Sao Paulo Tasi Tolu, Edifisiu Protesaun Sivil, Cruz Vermelha, Liceu, Infordepe, no Igreija Bidau,” DG SEPS Babo dehan.

Nia dehan, familia afetado nain 1.500 ne’e oras ne’e dadaun iha hela sentru evakuasaun sira ne’e no hetan ona apoio emergensia husi governu, igreja, no instituisaun privadu, no grupu individu balu.

“Ita mos agradese ba ita nia maluk balun ne’ebe mak iha situasaun hanesan ne’e sira la hein governu, maibe sira iha kbit naton no inisiativa diak hodi tulun ita nia maluk afetadu dezastre naturais sira,” nia hateten.

Nia dehan dadaun ne’e governu halo ona identifikasaun ba familia vitima sira ne’ebe mak uma estragus total no normal nune’e bele apoio ekipamentos konstrusaun sira nune’e sira bele halo fali hela fatin.

Entretantu, Deputadu Mariano Asnami Sabino hateten, dezastre naturais ne’ebe mak hasoru komunidade sira ne’e governu tenke halo intervensaun lalais hodi tulun ita nia komunidade afetadu sira.

“Ita hare komunidade sira terus liu primeiru tanba implementasaun serka sanitaria, segundu dezastre naturais ne’ebe mak akontese kuaze Dili laran,” Deputado Asnami dehan.

Nai dehan, governu tenke foti dadus kompletu vitima sira iha Dili laran la’os ba sira ne’ebe mak evakua sai husi hela fatin deit, tanba komunidade balun la evakua ba sentru evakuasaun sira maibe sira nia hela fatin hetan estragus hotu.

“Ita husu governu tenke responde situasaun ne’e ho seriu hodi tulun ita nia komunidade sira, tanba dadaun ne’e sira komunidade mak iha inisiativa tulun malu rasik ona,” nia husu.

Iha parte seluk familia vitima Maria Elvira da Costa hateten, dezastre naturais ne’ebe akontese ne’e la’os fo sala governu maibe hanesan vitima husu governu apoio halo intervensaun lalais nune’e sira bele fila ba ida-idak nia hela fatin.

“Ai-han ne’ebe governu no maluk komunidade balun oferese mai ami iha sentru evakuasaun ne’e balun la hetan tanba la to’o no balun simu dobel,” nia dehan.

Tanba ne’e nia husu governu atu apoio ai-han ba komunidade afetadu sira tenke sufisiente nune’e bele to’o ema hotu nune’e labele mosu diskriminasaun.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04