- Publika iha: 16 Abril 2021
Komandu Jeral Polisia Nasional Timor-Leste (PNTL) orienta membru Unidade Polisia Maritima (UPM) hamutuk pelotaun 2 hodi asegura seguransa iha area juridiku Dili nian durante implementasaun serka sanitaria.
Komandante Unidade Polisia Maritima (UPM), Bazilio de Jesus, hateten PNTL nia misaun ne’e klaru no hatur ona iha artigu 174 defini lolos ona katak polisia tenke asegura seguransa nasional sai fator determinante iha dezenvolvimentu nasional.
“Ho nune’e komandu jeral PNTL fo ordem mai Unidade Polisia Maritima hodi orienta membru sira fo apoio seguransa hodi kontrola komunidade nia movimentu iha serka sanitaria,” Komandante UPM Jesus dehan.
Nia dehan, UPM nia servisu la’os hare deit ba seguransa iha tasi maibe karik nesesidade ruma ne’ebe mak presija UPM nian apoio serviso iha rai maran sira mos bele halo seguransa tuir misaun polisia nian.
“Tanba ne’e ita hatun ona membru pelotaun rua (2) hamutuk 60 pesoas hodi apoio seguransa iha postu polisia sira ne’ebe monta iha pontu entrada sira iha Dili laran,” nia hateten.
Entretantu, Diretor Fundasaun Mahein (FM), Joao Almeida, hateten, koalia konaba seguransa nasional ne’e polisia liu husi nia unidade hotu iha kompetensia atu asegura maibe ne’e hare ba situasaun ne’ebe mak amiasa tebes ba seguransa nasional.
“La’os situasaun normal hela mos ita hatun hotu membru unidade sira halo seguransa ne’e ita halo tauk ita nia povu no hatudu parte fraku ba sira,” FM Almeida dehan.
Tanba ne’e nia dehan, dadaun ne’e labele hatun membru sira formadu ho arma sira iha Dili laran, tanba ne’e hatudu ba komunidade katak situasaun ne’ebe mak la diak atu akontese.
“Karik sira atu apoio seguransa iha area juridiku iha Dili nian ligadu ba serka sanitaria la presija tun armadu ho arma sira,” nia salienta.