- Publika iha: 15 Junho 2021
Durante fulan maio 2021, Unidade Patrolimentu Fronteira (UPF) kaptura sidadaun nain 21 ne’ebe tenta tama Timor-Leste liu husi dalan ilegal iha fronteira terestre.
Vise Ministru Interior (VMI), Antonio Armindo, hateten hahu husi fulan fevreiro no marsu movimentu ilegal la akontese iha fronteira tanba hetan seguransa husi Unidade Patrolimentu Fronteira (UPF) no apoiu husi Unidade Espesial Polisia (UEP) asegura metin fronteira.
“Maibe iha fulan Maiu ne’e movimentu ilegal kuntinua akontese iha fronteira, no ita nia ekipa UPF konsegue kaptura sidadaun hamutuk 21 ne’ebe mak halo movimentu ilegal no tenta tama mai teritoriu nasional,” nia hateten.
Nia dehan, sidadaun nain 21 ne’ebe mak sira kaptura ne’e submete ona ba ministeriu saude hodi halo teste swab no dadaun ne’e sira hela iha kuarentena Mota Ain.
“Dadaun ne’e movimetu ilegal iha fronteira komesa akontese fali ona maibe ita orienta ona komandu jeral hodi koloka membru barak liu tan hodi apoiu kontrolu iha linha fronteira hodi kontrola movimentu illegal.
Enkuantu nia dehan, iha fulan abril ne’e UPF mos rejistu movimentu ilegal hamutuk 19 no iha fulan maiu rejistu tan 21.
Alende ne’e nia dehan, aktividade merkadoria iha fronteira la’o normal autoriza tama iha segunda no sai iha loron kuarta kada semana.
Entretantu, Komandante UPF, Superientendente Joao Sancio dos Reis, hateten iha fulan rua Abril no Maiu UPF kaptura sidadaun nasional hamutuk 30 ne’ebe mak tama ilegal mai teritoriu nasional liu husi fronteira ilegal Tunubibie nune’e mos Batugade no Salele.
“Iha fulan Abril ita kaptura 19 no Maiu 21, sidadaun hirak ne’e hakat liu fronteira hodi ba halo aktividade merkadoria iha nasaun vizinhu indonezia,” nia hateten.
Nia dehan, sidadaun hirak ne’e bainhira fila husi nasaun vizinu mai, ekipa patrulhamentu konsegue hetan hodi kaer no submete ba kuarentena hodi kumpri protokolu husi ministeriu saude.
“Dadaun ne’e ita nafatin aperta metin seguransa iha fronteira terestre entre Timor-Leste no Indonezia hodi evita movimentu ilegal,” nia salienta.